Abiertu’l plazu de matriculación pa la prueba de conocencia de mayu qu'entama l'ALLA

|

El sábadu 30 va celebrase la prueba de conocencia de mayu, la segunda qu’entama nesti cursu l’Academia de la Llingua Asturiana (ALLA). La matrícula va tar abierta hasta’l xueves anterior, 28 de mayu. Mentes, el plazu d'inscripción pa la UABRA va principiar el llunes viniente, día 25.

“L'Academia de la Llingua Asturiana, sabiendo'l fondu interés de munches persones de llograr que se reconoza la so conocencia de la llingua y manifestar asina'l so fondu amor al idioma asturianu”, ta acabante d’abrir la matrícula del segundu de los dos esámenes que celebra tolos años –el primeru ye en xineru–, que sirve pa que les persones interesaes puedan algamar el documentu qu’afita la so conocencia d’asturianu nel nivel 1 o básicu. Pa ello han d’amosar un dominiu tanto de les normes llingüístiques como de la situación actual del idioma y del procesu de normalización nel que ta inxertu.

L’esame cuenta con dos partes, escrita y oral. La primera va principiar con un dictáu, pa continuar con una torna, una serie d’exercicios gramaticales y una redaición. Darréu, l’aspirante a algamar el títulu de conocencia pasará a otra sala u caltendrá una conversación breve con dalguna persona del xuráu que valorará’l so dominiu oral del idioma. Les persones interesaes en facer la prueba de conocencia tienen de plazu hasta’l xueves día 28 pa formalizar la matrícula na sede de la institución (L’Águila 10, Uviéu) nel horariu siguiente: de 9 a 15 hores y de 16 a 19 hores, de llunes a xueves; y de 9 a 14 hores, el vienres. L’esame va celebrase’l sábadu 30, a les 9.30 hores, na Escuela d’Inxeniería Informática de la Universidá d’Uviéu (cai Valdés Sala), nel campus uviedín de Los Catalanes.

Otra manera, el plazu d’inscripción pa la Universidá Asturiana de Branu (UABRA) va principiar el llunes viniente, día 25, y va tener como fecha llende’l 5 de xunu. Cangas del Narcea va acoyer un añu más esta iniciativa, que nesta ocasión va desendolcase del 3 al 14 d’agostu.

Contador Estadistiques