Abiertu’l plazu de matriculación pa la prueba de conocencia de l’ALLA

El sábadu 28 de mayu ta convocada la prueba semestral de conocencia qu’entama l’Academia de la Llingua Asturiana (ALLA). Esti llunes la institución abre'l plazu de matriculación, que va zarrase'l xueves día 26.
 
L’ALLA vien años convocando esta prueba col oxetivu de que les persones que quieran que se-yos reconoza la so conocencia d’asturianu puedan recibir un documentu acreditativu. Pa ello, la institución convoca un esamen en xineru y otru en mayu nel que los matriculaos deben superar una prueba escrita y otra oral. Éstes van centrase en dos estayes: la llingüística y la de ‘llingua y sociedá’.
 
Na primer d’elles va evaluase’l conocimientu del funcionamientu gramatical del idioma y de la normativa académica, l’emplegu amañosu de la llingua na escritura al traviés d’exercicios, y el so usu nuna conversación. Mentes, na segunda va esaminase la conocencia del allugamientu del asturianu dientro la sociedá asturiana y el procesu de normalización.
 
Los interesaos en presentase a la prueba de conocencia, que va celebrase’l sábadu 28 de mayu a les 9.30 hores na Facultá de Formación del Profesoráu y Educación d'Uviéu, van tener de plazu hasta’l xueves día 26. Pa ello han de pasar pela sede académica, asitiada na cai L’Aguila númberu 10 d’Uviéu, o llamar al teléfonu 985.21.18.37. Tamién pue tramitase la matrícula na rede nel corréu electrónicu alla@asturnet.es.