Abiertu’l plazu de matrícula pa la Universidá Asturiana de Branu

Los interesaos n’acudir a Cangas del Narcea pa participar na Universidá Asturiana de Branu (UABRA) qu’entama l’ALLA yá pueden matriculase nel llar de la institución. El plazu pa inscribise en cualisquier de los cursos va terminar el 3 de xunu.
 
Esta edición de la UABRA torna a facese na Escuela-Hogar de Cangas del Narcea, onde los alumnos y alumnes van tar internos. Ehí van impartise, ente los díes 1 y 12 d’agostu, los cursos siguientes: elemental de llingua asturiana, avanzáu de llingua asturiana, de gallego-asturianu (primer fase) y dellos d’afondamientu cultural y llingüísticu.
 
Éstos últimos son un total d’ocho cursos selmanales de 35 hores llectives de temática variada. Asina, la xente interesao pue escoyer ente ‘Capacitación pa la traducción al asturianu’, ‘Coses nueves n’Internet. Aplicaciones personales y educatives’, ‘El Navia-Eo: espaciu, cultura y futuru’ y ‘Xuegos y tradiciones populares asturianes’, toos na primer selmana (del 1 al 6 d’agostu). Mentes, na segunda (del 8 al 12 d’agostu), los cursus qu’ufre la UABRA son ‘Asturies nel sieglu XXI: crisis, economía y sociedá’, ‘Historia d’Asturies: nueves perspeutives’, ‘Cómo trabayar la espresión escrita n’asturianu na Educación Secundaria y Bachilleratu’ y ‘Cursu d’aniciu a la investigación toponímica’.
 
Pa tramitar la matrícula pa participar en cualisquier de los cursos de la UABRA ye necesario dir al llar de l’Academia de la Llingua Asturiana (ALLA) de llunes a vienres, n’horariu de mañana y tarde, enantes del día 3 de xunu. Otra manera, esti sábadu va celebrase la prueba de conocencia del mes de mayu na Facultá de Formación de Formación del Profesoráu y Educación d'Uviéu a partir de les 9.30 hores.