Abiertu’l plazu de matrícula na Universidá Popular de Xixón

La Universidá Popular de Xixón presentó ayeri la campaña de matriculación pa la so ufierta de cursos del primer trimestre del 2005, la primer tanda de cursos d'esti 2006 en que la UP de Xixón celebra los sos primeros 25 años.

En total son 174 cursos con 2.816 places disponibles les que salieron a ufierta, lo que supón que dende 1981 la UP lleva daos cerca de cinco mil cursos y que peles sos clases tienen pasao sobre 76.000 alumnos. Les matrícules puen facese d'equí en p'alantre hasta'l 27 de xineru nes oficines d'atención al ciudadanu, anque un 25% de les places de tolos cursos tan acutaes pa poder reservales al traviés d'internet. Los demandantes de plaza han ser mayores de 16 años, y la ufierta temática abarca dende les nueves tecnoloxíes, artes escéniques, plástiques y visuales, temes d'información, historia, manualidaes, música, y de llingua y cultura asturianes ente otros. L'entamu de les actividaes va ser el día 20 de febreru, acordies colos horarios y conteníos de cada cursu, que puen vese na web de la Fundación Municipal de Cultura de Xixón.