Abierta la inscripción pal Cursu Básicu de Llingua Asturiana de Corvera

Ye de baldre y pue formalizase hasta'l día 26.

Como ye vezu por estes feches, el Conceyu de Corvera entama un Cursu Básicu de Llingua Asturiana p'adultos col envís de que los asistentes conozan tanto les normes básiques d'escritura del idioma como dellos aspeutos de la cultura asturiana. Asina, los conteníos del mesmu son historia de la llingua asturiana; léxicu, sintaxis y morfoloxía; normes ortográfiques; introducción a la toponimia de Corvera; y creación cultural n’asturianu.

L'encargáu de poner les clases ye Rafael Rodríguez Valdés, téunicu responsable del Serviciu de Normalización Llingüística de Corvera. Éstes, un total de 15, van desendolcase nel Aula Polivalente del Centru Sociocultural de Les Vegues tolos martes, de 18 a 20 hores, a partir del viniente.

La xornada de comienzu del cursu va ser tamién l'últimu día pa poder matriculase nel cursu, que ye de baldre. Pa ello ye necesario averase a cualesquier Rexistru del Conceyu.