Abierta la inscripción pa ‘Entaína’, la primer carrera familiar pol asturianu

|

La páxina web de ‘Reciella. Families pol Asturianu’ yá ufre’l formulariu pa participar nel IV Día de la Reciella en ‘Entaína’, la primera carrera familiar pol asturianu. Asturies.com espubliza’l karaoke del cantar d’esta xornada, de Skama la Rede.

‘Entaína’ trátase “d’una carrera non competitiva, festiva y cola tresmisión interxeneracional del asturianu como filu conductor”, espliquen dende Reciella. Anque la inscripción ye individual y nominativa, dende la organización animen a los y les participantes a que cuerran en grupos familiares o d’amigos y amigues “pa visibilizar asina l’asturianu como un elementu de comunidá y que se tresmite ente xeneraciones”.

La inscripción tien un costu simbólicu de 3 euros pa los mayores d’edá y de 2 pa los menores cola fin d’abonar el gastu organizativu de la carrera. La organización pon un tope de 300 corredores, polo que se recomienda acutar plaza con antelación

Percorríu de dos quilómetros

La salida de la prueba ta prevista pa les 10.30 hores del domingu 2 d’ochobre, Día de la Reciella, y va facese pel Muséu del Pueblu d’Asturies y pel terrén averáu nun llargor de dos quilómetros, anque habrá tramos más curtios pa los más rapacinos. Reciella va poner avituallamientu pa tolos participantes, que van a entrar nun sortéu de regalos tres la carrera.

Otra manera, Asturies.com ta acabante d’espublizar un videu-karaoke col cantar de ‘Entaína’ cola fin de que grandes y pequeños puedan deprendela de cara a la xornada. Ésti ye de Skama la Rede con lletra del miembru de Reciella, David Guardado.

Contador Estadistiques