Abelardo: "La mio primer patria ye Asturies y Catalunya, la segunda"

|

Sporting y Barcelona enfréntense esti miércoles n'El Molinón con dos téunicos asturianos nel bancu.

Abelardo y Luis Enrique, futbolistes que llevaron una vida 'casi' paralela dende que dieron les sos primeres pataes nel Xeitosa, trunfen agora como téunicos. El primeru nel club de los sos amores y el segundu, nel que desplegó los sos meyores años de futbolista. Un tiempu nel que, precisamente, compartieron la camiseta azulgrana.

Agora, casi 15 años depués, dambos van enfrentase per primer vegada nos bancos. Va ser a les 18.30 hores n'El Molinón, partíu pal que ta tol papel vendíu y nel qu'Abelardo reserva a dalgunos de los sos homes dao'l choque importante al que va tener qu'enfrentase'l Sporting el sábadu nel Benito Villamarín col Betis. Asina, Sergio Álvarez, Luis Hernández y Carmona quedaron fuera de la convocatoria xunto col mancáu Sanabria por precaución, y güei serán de la partida dellos suplentes, ente ellos l'inéditu Lichnovsky.

Respetu al país de nacencia y al d'adopción

El partíu ta teniendo muncha repercusión tanto n'Asturies como en Catalunya, pol pasáu azulgrana d'Abelardo y l'orixe xixonés de Luis Enrique. Y nestos díes dambos nun duldaron, como faen siempre, n'amosar un gran ciñu al so país de nacencia y al d'adopción, asina como a la llingua asturiana.

D'esta forma, Abelardo nunes declaraciones al diariu 'Sport' apuntó que "considérome un asturianu catalanizáu. Catalunya ye la mio segunda patria: la mio primer patria ye Asturies y llueu, Catalunya. La mio muyer y yo somos los dos asturianos, pero tratáronnos tan bien… Siéntome asturianu y catalán".

Pela so parte, Luis Enrique dexó como anéudota un "Puxa Sporting y Puxa Xixón" enantes de la so rueda de prensa previa al partíu, dalgo que captaron los micrófonos de la sala.

 

Contador Estadistiques