Abelardo, estrella de la Selección

Tres años tuvo qu'esperar el defensa asturianu Abelardo Fernández pa vestir la camiseta asturiana, qu'a la fin va poder defender énte la selección d'Honduras el día 28 nel Suárez Puerta d'Avilés. El seleccionador José Manuel Díaz Novoa, apurrió ayeri n'Avilés la llista de venti futbolistes convocaos. La llista presenta dellos de los meyores xugadores del país, pero tamién falten dellos importantes, echándose a faltar a xente tan carismático como Luis Enrique, amás de Pablo Lago, Sergio, Boris o Angulo, dientro de la lliga española o Marcelino, que tien imposible'l venir a esti acontecimientu por culpa del calendariu de la competición inglesa. Sicasí, lo que más llama l'atención ye que, de los venti convocaos, namás que cuatro xueguen n'equipos asturianos, convirtiendo esti Asturies-Honduras nel partíu de la diáspora.


-Porteros: Esteban (Atlético) y Julio Iglesias (Valladolid)
-Defenses: Javi Venta (Villarreal), César (Deportivo), Abelardo (Alavés), Urbano (Ejido), Sietes (Racing de Santander), Manolo (Numancia) y Manel (Deportivo)
-Centros: Mario (Sevilla), Castaño (Levante), José Manuel (Hannover 96), Cobas (Sporting de Xixón), Iván Ania (Tenerife), Pablo Díaz (Oviedo) y Rubén Reyes (Villarreal)
-Delanteros: Juanele (Zaragoza), Villa (Sporting), Oli (Uviéu) y Miguel (Eibar).

Les entraes pal partíu yá puen comprase nos supermercaos d'El Corte Inglés d'Avilés, Xixón y Uviéu, al preciu de 3 euros pa rapacinos de menos de 14 años y 9 pa los mayores.