Abascal manifiesta qu'en Xixón "se va a defender la lengua española"

VOX celebró nel mitín d'El Náutico la so entrada nel gobiernu facilitada por Foro.

Con música de Manolo Escobar arrancaba ayeri l'actu, al qu'asistieron dellos centenares de persones, ocupando una parte de la plaza, la más cercana onde s'asitien grades. "VOX está en el gobierno de 'Gijón', pese a quién pese" entamaba la so intervención José María Figaredo, que repite como candidatu por Asturies, anque la intención de los presentes yera ver a Santiago Abascal, presidente del partíu.

"En 'Gijón' van a volver las libertades, se va a defender la lengua española y respetar el modo de hablar de los asturianos, pero no se le va imponer a nadie. Y van a volver nuestras tradiciones perdidas por una alcaldesa totalitaria", dixo en referencia a los toros. Nun foi la única referencia que fixo a l'asturianu, yá que tamién negó que la intención de la conceyala Sara Concepción Álvarez Rouco de nun programar dende Festexos a los artistes qu'usen l'idioma sía delitu d'odiu, como denunció Andecha Astur énte Fiscalía, apuntando que "será absuelta".

Na acera de la cai Cabrales, mentes, decenes de persones concentráronse pa manifestase contra l'actu, con xiblíos o glayíos como 'fuera fascistes de Xixón'. Tamién llanzaron cantares pidiendo la dimisión de l'alcaldesa de Foro, Carmen Moriyón, que facilitó la entrada de VOX nel gobiernu a cambiu de la investidura.

Xuntanza feminista

Hora y media enantes del actu d'El Naútico taba convocada una xuntanza feminista nel salón d'actos de la Biblioteca Pública Xovellanos pa esixir a Moriyón que rompa l'alcuerdu con VOX que condiciona polítiques d'Igualdá. Ésta tuvo que salir a la cai y celebrase na cai Francisco Tomás y Valiente dada l'alta asistencia.

Na semeya, la plaza d'El Naútico mientres el mitín d'Abascal.