“Abandono de manera definitiva la política municipal, pero non la mio actividá en Foro”, afirma Iglesias

|
Inaciu Iglesias

Inaciu Iglesias dexó esti xueves de ser edil del equipu de gobiernu municipal de Noreña. L’hasta agora conceyal d’Economía y Facienda, Cuentes, Réxime Interior, Personal y Desarrollu Llocal abandona “de manera definitiva la política municipal” por “razones estrictamente llaborales”, pero sigue na Comisión Direutiva de Foro.

“Ye una decisión que se precipitó nes selmanes últimes”, señaló Iglesias a Asturies.com, que nun comunicáu asoleyáu ayeri esplicaba que la causa de la so decisión foron “cambios na estructura societaria de la mio empresa, renovaciones nel comité de dirección y nueves y esixentes inversiones en marcha” que-y obliguen a una “dedicación total al negociu familiar”. “Hai una diferencia pergrande ente tar na oposición y nel gobiernu, qu’esixe una dedicación intensa”, añade l’edil de Foro que, con esti pasu, da por zarráu’l so pasu pela política municipal.

“Foron 6 años, que son munchos, nos que lo fixi lo meyor que supi y pudi”, calca l’ex edil que, sicasí, nun dexa la so actividá nel partíu, yá que va continuar na Comisión Direutiva, onde ye vocal. Faciendo un repás a esta llexislatura última, amuesa la so satisfaición por ser quien a sacar alantre los presupuestos poniendo d’alcuerdu a formaciones tan diferentes como Independientes por Noreña (IPÑ) y Conceyu Abiertu por Noreña, amás d’otros fechos práuticos como la construcción del campu de fútbol, l’emburrie a la rellación de puestos de trabayu, l’aprobación de les ordenances d’asturianu o la instalación d’un semáforu en Ferrera, “dalgo que pue paecer mui simple pero nel qu’hubo que mover montes pa responder a esta necesidá de los vecinos”.

Corzo, sustituta

Tres la dimisión d’Iglesias, el cargu d’edil pasa a corresponder al númberu 2 de la llista de Foro, Beatriz Corzo, cola que “llevo trabayando coldu con coldu too esti tiempu”. Les competencies que caltenía pasen agora a l’alcaldesa, María Amparo Antuña, qu’ha de decidir la función de Corzo nel equipu de gobiernu de coalición d’IPÑ y Foro.

Contador Estadistiques