A Veiga recibe una réplica de la Estela de Nicer

Fecha polos restauradores del Muséu Arqueolóxicu d'Asturies.

La Estela de Nicer foi alcontrada ne 1933 en Piantón. Diez años más tarde, Antonio García y Bellido reconoció y publicó la inscripción, que quedó a partir d'entós curiada y espuesta nel Muséu Arqueolóxicu. La pieza orixinal ye una inscripción funeraria llatina perteneciente a Nicer Clutosi, príncipe de los Albiones, una tribu identificada por Plinio y Ptolomeo nes sos obres como una de les qu'habitaben nes cercaníes del ríu Navia.

Fecha en piedra arenisca, ye una pieza completa, malpenes estazada nel so estremu superior, na que na so cabecera apaez una media lluna sobre una especie de trébedes, que sofita sobre una llinia de la que, nel so estremu esquierdu, cuelga un discu solar radiáu. García y Bellido rellacionó estes inscripciones con ciertos símbolos de les esteles oikomorfes de Poza de Sal (Burgos). Tienen semeyanza, coles mesmes, con decenes de motivos inscritos sobre roques con grabaos prehistóricos en La Xorenga (Grandas de Salime).

Agora, A Veiga dispón d'una réplica de la Estela gracies a la entrega fecha pola Conseyería d'Educación y Cultura. La directora xeneral de Patrimoniu, Otilia Requejo, emponderó'l trabayu realizáu pol departamentu de restauración del Arqueolóxicu que, al so xuiciu “respuende de forma brillosa a la iniciativa y solicitú del Conceyu d'A Veiga”. Nel actu d'entrega intervinieron tamién l'alcalde del conceyu, César Álvarez, y el conceyal de Cultura, Abel Pérez, y tuvieron presentes representantes del muséu y miembros de l'Asociación d'Amigos d'A Veiga.

La reproducción de la pieza foi realizada pola restauradora de la institución, Beatriz García Alonso, qu'emplegó téuniques de moldio manual, preservando siempre el caltenimientu afayadizu del orixinal.