A Veiga pieslla la llexislatura pa la toponimia

Nel Conseyu de Gobiernu d'esti xueves 24 de mayu, aprobóse'l decretu pol que s'oficialicen los topónimos tradicionales del Conceyu de A Veiga, que fai el númberu 24 dientro de los conceyos que ven oficializada la so toponimia nesta llexislatura qu'agora acaba y na que s'oficializaron en total los nomes de llugar de cerca de la tercera parte d'Asturies . La Xunta Asesora de Toponimia, que'l so trabayu pue vese na web oficial de la Oficina de Política Llingüística, pieslla d'esta manera la llexislatura 2003-2007 viendo como s'aprueba la toponimia tradicional d'un conceyu del Navia-Eo, xusto como entamó'l procesu cola aprobación, el 21 d'abril del 2005 de los trés primeros espedientes toponímicos que recuperaben con calter llegal, los nomes tradicionales de los conceyos de El Franco xunto colos de Carreño y Llanes.