A San Mateo tamién-y gusta'l folk

Ente la programación musical de San Mateo podemos rescatar un conciertu esti sábadu nel antiguu "CarlosTartiere", grupos asturianos y gallegos de folk prometen una bona nueche.Los grupos gallegos son "Milladoiro", que ya tuvieron esti veranu en Xixón y dexaron mui bona impresión, cambiaron dellos de los sos componentes, l'arpista y el vigulineru son dos mozos nuevos con una técnica bien depurada, amás del restu de la banda que con gaites gallegues, irlandeses, curdiones, voz...etc, formen un espectáculu enforma entreteníu. El segundu grupu gallegu van ser "Luar na Lubre", que tamién tuvieron esti veranu en Mieres presentando'l so caberu discu "Espiral", y p'acabar cola representación gallega "Cristina Pato", que tamién vien col so discu "Xilento".Los asturianos son "Guxán de Lluz", grupu formáu por alumnos de la escuela de música de Llanera que presentaron esti añu'l so "Nel mar del norte", folk acústicu, que como ellos mesmos dicen, quier amosar la esencia tradicional con personalidá propia. La otra banda asturiana sedrá "Felpeyu", perbona ocasión pa ver a los xixoneses n'Asturies, de los qu'esperamos poder escuchar el so tercer discu d'estudiu esta seronda.El conciertu entama a eso de les 22:30 y la entrada pa ver a estos cinco grupos ye namás de 5 €, dende equí vos los recomendamos, y si queréis ver más conciertos de San Mateo podéis visitar la nuestra guia d'ociu.