A Río Narcea cuádren-y les cuentes

La empresa minera Rio Narcea Gold Mines, anunció un bon resultáu pa los primeros seyes meses del añu. Cola baxada nos costes de producción y la xuba de la cotización del oru nel mercáu, RNGM algamó ún resultáu record na so historia, ganando 4,2 millones de dólares. La producción d'oru nestos seyes meses xubió un 50% y la compañía yá cuenta con pasar de les 155.000 onces que contaben con producir nesti 2002. Nel exerciciu 2.001 la multinacional de capital canadiense que cotiza na Bolsa de Toronto sacare d'Asturies 124.363 onces, el 28% más de la producción del 2.000. Pa ello tuvo que revolver cásique 650.00 tonelaes de tierra, que rindieron 6,5 gramos de mineral per tonelada. Esi rendimientu xubió nos primeros seyes meses d'esti añu hasta los 9,86 gramos, mientres que'l coste per onza baxó hasta los 117 dólares.El bon resultáu, que rescamplen énte'l mal añu 2.001, que la empresa acabó con perdes, parez que ta animando a la compañía a seguir afuracando tres del mineral. La mina d'El Valle ta enanchándose con una esplotación baxo tierra qu'entamó esti añu. Según esplica la empresa, 4 aparatos de perforar escarbaron en total 4018 metros de furacu pa la parte de Boinás, y cuenten con abrir otros 10.000 mts nel 2003. Esti resultáu récord vien a apaecer xusto nel añu nel que'l grupu empresarial sufriere dellos cambeos nel accionariáu qu'acabaron cola desapaición de la empresa del grupu empresarial gallegu Hullas del Coto Cortés, controláu pol grupuBancu Pastor y Unión Fenosa. Tres una primer venta de 8,5 millones d'acciones por 1.000 millones de pesetes, Coto Cortés vendió lo que-y quedaba nesti negociu, mientres que la so filial Lignitos de Meirama acabó tamién por desfacese del 14% que-y quedaba allá pel mes de mayu. L'accionista mayoritariu de RNGM ye agora la casa canadiense NTC Trust.