¿A mano o a máquina?

La marea negra, que llegó ayeri a Francia, sigue empuercando tamién les playes asturianes. Mientres el galipote nun dexa de manifestase, agora en forma de pelotines menudes que se posen polo menos en cerca de trenta playes del país, una empresa de Xixón vien a sumase al garapiellu de cases comerciales que presenten ferramientes y remedios pa desaniciar el galipote. Ello ye que la empresa asturiana Ferjovi anunció que na playa gallega d'O Grove yá se prebaron, con bon resultáu, les máquines de llimpieza a presión que faen ellos pa llimpiar un pedreru. La casa anunció que, anque ta pendiente de ver qué deciden les alministraciones, yá tan apretando'l ritmu de producción d'estos preseos col envís de dar abastu al pidíu oficial que pudiere llegar.Sicasí, parez que, anque'l resultáu a la vista del llabor d'estes máquines ye ensin dulda meyor que la retirada a mano, pue ser peor el remediu que la enfermedá. A los espertos de la Facultá de Bioloxía de la Universidá d'Uviéu , que lleven tiempu ofreciéndose p'ayudar a l'alministración ensin tener rempuesta nenguna, abúlta-yos que meter una máquina de chorru pa desaniciar el galipote de los pedreros pue dexenerar nun plazu de recuperación d'estos pa la fauna más grande que si se fai un llabor superficial de retirada del galipote a mano y depués se dexa que la mar vaya llevando lo que quede. De facese esto, el tiemu pa que'l pedreru se recupere pue ser hasta la metada que si se gasta una técnica abrasiva pa cola piedra que va impedir que la vida pueda posar nella en bien de tiempu. Los biólogos lleven tiempu diciendo qu'hai qu'estremar ente llimpiar el galipote, qu'implica un dañu a la superficie, y retiralo, que ye lo que ven que fai falta.