“A la xente d’otros territorios sorprende-yos la postura radical del PP pa col asturianu”, apunta Inaciu Galán

Los participantes del II Hizkuntza Gutxituetako Hiztun Gazteen (HIGA!), alcuentru de moces y mozos falantes de llingües minorizaes celebráu en Gasteiz, interesáronse pol documental ‘La vida ensin oficialidá’ y la situación del idioma. Inaciu Galán señala que fuera d’Asturies sorprende “la postura radical del PP pa col asturianu”.

Mientres cuatro díes, 70 representantes de 31 llingües minorizaes de tol mundu participaron la selmana pasada nesta iniciativa entamada pol ayuntamientu gasteizarra y la Euskal Herriko Unibertsitatea (UPV-EHU). El nuesu idioma tuvo representáu por Iniciativa pol Asturianu nes xornaes programaes como cursu de branu de la institución universitaria, en concreto al traviés d’Inaciu Galán y d’Iván Llera, presidente y vocal del coleutivu, de manera respeutiva.

“L’HIGA! tuvo mui bien, con charres mui interesantes y presencia de xente de tol mundu, inclusive americana y asiática”, apunta Galán, que destaca tamién los talleres “que sirvieron d’intercambiu d’esperiencies”. Asina, amás de contautu con falantes mozos de llingües minorizaes yá bien conocíes, como les peninsulares o’l bretón y el galés, los dos asturianos pudieron conocer la situación del silesiu o’l wymysou, dientro del continente, y del uru uchumataqu, el zapotecu o’l tamil, fuera del mesmu, ente otres muncho idiomes.

Nengún de los participantes perdióse la proyeición de ‘La vida ensin oficialidá. Les consecuencies de la falta de drechos llingüísticos n’Asturies’, documental que recueye dalgunos de los munchos casos de discriminación llingüística que se viven nel país “pese a que se programó tarde, en tiempu de posa”. “Sorprendiéronse poles situaciones que se cuente nél, interesáronse muncho pol procesu de la oficialidá y fixeron munches entrugues”, destaca Galán, que se vien decatando de que “esiste un mayor conocimientu sobre l’asturianu y sobre la esistencia d’una comunidá viva de falantes y reivindicativa después de que nos meses últimos saliera l’alderique nos medios de fuera d’Asturies”.

Tamién apunta que “a la xente d’otros territorios con llingua oficial sorprende-yos la postura radical del PP pa col asturianu. Ye bien conocida la posición contraria del PP coles llingües que nun son el castellanu, pero lo del PP d’Asturies nun dexa de llamar l’atención”.

Reglamentu d’usu del asturianu na universidá

Precisamente’l PP, xunto con Ciudadanos, vien de protagonizar un ataque nuevu al idioma, nesta ocasión pola aprobación de l’adaptación del reglamentu d’usu del asturianu na Universidá d’Uviéu pa cumplir la llegalidá vixente. Pa los populares trátase de una oficialidá encubierta na institución.

“Ye dalgo que taba reguláu dende’l 2009 y normalizao, y nun s’entiende la crítica cuando lo que se ta faciendo ye cumplir la llei”, llamenta Galán, que fai referencia tamién al desconocimientu amosáu polos representantes de dambos partíos, a los qu’acusa de pretender “desacreitar y crear prexuicios”.