A falta d'una…

El mercáu de gaites asturianes ta viviendo un añu perimportante,
a finales d'esti añu presentáronse dos fabriques que representen un cambiu nes posibilidades que tien un comprador/a.
El pasáu 14 de noviembre presentóse de forma oficial la fabrica de gaites "Hevia Parrado y Aragón" en Guadarrama, Madrid. L'actual situación de gran demanda d'instrumentos, asina como una ufierta que nun ye quien a atender los pidimientos d'instrumentos, xenerando llistes d'espera d'hasta dos o tres años por una gaita, ficieron pensar a los sos promotores na necesidá de crear una fabrica de gaites. Jose Angel Hevia, al entrar en contactu con unos artesanos cordobeses pa que-y ficieren una flauta pa la so primer xira col discu "Tierra de nadie", empezó a cocer el proyectu de la fabrica de gaites. Según los sos promotores, nesta fabrica van facese gaites d'alta calidá, con precios qu'oscilen ente les 160.000 y les 300.000 pesetes. Les más de les gaites sedrán de madera de granadillu con fuelles de gore-tex, incluyendo amas, nos modelos mas caros de la gama, adelantos pa que l'afinación seya más amañosa, como ye'l casu del émbolu d'afinación, que permite afinar la gaita ensin falta de sacar la payuela del espigu. Non solo van facese, gaites asturianes, tamién gaites gallegues flautes irlandeses, dulzaines castellanes…etc. Dende la fabrica tamién espliquen la so voluntá de collaborar colos constructores artesanales, ufiertándo-yos la fábrica pieces de la gaita ensin acabar pa qu'ellos les rematen y asina amenorgar el tiempu que tienen qu'esperar los clientes pola so gaita.D'otra parte, n'Asturies tamién arranca otru proyectu nel conceyu de Santu Adrianu, Fábrica de Gaites Les Xanes.Durante un añu 16 persones tuvieron deprendiendo a facer gaites de manera industrial, amas de traxes tradicionales.Cola collaboración de la Universidá d'Uviéu y la Du Pont, pusiéronse a construir gaites d'un productu plásticu que da un soníu paecíu a la madera, pero que sobre too abarata'l productu. Esta iniciativa quier introducir nel mercáu una gaita barata de buena calidá, que sirviría pa escueles de música, nuevos gaiteros que nun quieren gastar muncho dineru al principiu..etc. El preciu d'esta gaita rondara les 60.000 pts. Amas, tamién se fadran gaites de distintes maderes, tamién habrá un modelu, el mas caru, de fabricación artesanal. Agora queda esperar pa saber cual va ser l'acoyida que-y van dar los músicos a eses gaites, y cual va ser la reacción de los artesanos tradicionales.

Contador Estadistiques