A Caridá va acoyer cuatro sesiones de teatru costumista esta selmana

L’Auditorio As Quintas d’A Caridá va acoyer la representación de cuatro obres de teatru costumista hasta’l xueves. Éstes son dalgunes de les actividaes que s’entamen nesta población dientro de la XXX Semana Cultural de San Miguel.

El Grupo de Teatro Pico de Faro, d’A Roda, va abrir esta nueche esti ciclu cola obra ‘Outros tempos’, escrita por Manuel García Galano, pa mañana dar pasu a El Cioyo, de Castropol, cola representación de ‘A difunta y outras herbas’, de José Ramón Oliva. El turnu na xornada del miércoles ye pa As Xanas, de San Xuan de Prendonés, que va escenificar ‘La declaración’, obra orixinal de Julia Martínez que cuenta con arreglos del grupu de teatru franquin, mentes que’l xueves va zarrar l’actividá Aires Costumbristas, d’A Caridá, con ‘A burra de Don Calixto’, de Luis Martínez.

Toles funciones van ser a les 21.30 hores y tán integraes dientro de la programación de la XXX Semana Cultural de San Miguel qu’entama l’Ayuntamiento d’El Franco col patrocinio del Parque Histórico del Navia y la Conseyería d’Educación, Cultura y Deporte. Amás de teatru, dende’l pasáu día 15, A Caridá acueye charres, proyeiciones y esposiciones, como la que protagoniza Agustín Bayón na sala d’esposiciones d’As Quintas hasta’l 14 d’ochobre. Esti vienres, una charanga y una folixa van dar aniciu a les fiestes dedicaes al patrón llocal, San Miguel.  

Na semeya, el Grupo de Teatro Pico de Faro, que va representar esta nueche 'Outros tempos'.