92.500 euros pal futuru del gochu celta

La Conseyería de Mediu Rural y Pesca y l'Asociación de Criadores del Gochu Celta roblaron ayeri un alcuerdu pol que va desarrollase un programa pa la recuperación y promoción d'esta raza autóctona del país.

Les midíes que se contemplen nesti programa tan entamando a desarrollase y asina a iniciativa de l'Asociación de Criadores del Gochu Celta y col sofitu económicu de la Conseyería de Mediu Rural y Pesca ta acabante de crease un núcleu de multiplicación de la raza, mientres que'l Serviciu de Desarrollu Rural (SERIDA) tien l'encargu de xestionar la xestión d'un programa pa recuperar y promocionar esta raza. Los oxetivos del programa asítiense en finxos concretos como l'actuar como reserva de xenes de la raza, permitir la xuba de los censos o tamién maximizar la variedá xenética de los mesmos torgando la endogamia. L'oxetivu final nun ye otru que'l de la recuperación de la raza autóctona del gochu celta asturianu, que tuvo a piques de desapaecer y que gracies a esti programa, que cuenta cola esistencia de 2 machos y 6 femes certificaes, pue volver a convertise nuna especie de consumu comercial.

El programa d'actuación nel gochu celta va depender d'un conveniu que va firmase d'equí a poco y que va financiar la Dirección Xeneral de Ganadería, que va poner 92.548 euros.


En consiguiéndose los oxetivos básicos del plan, el futuru del gochu celta va depender de que se puedan comercializar con elli productos cárnicos estremaos y qu'estos tengan el preste del públicu. En cualquier casu, esta salida comercial pasa según los técnicos del SERIDA por facer un productu de calidá, pa lo que se recomienda la cría de los gochos al aire llibre y que s'acabe l'engorde a base d'abeyotes, castañes y otros productos del monte, aplicando pa la especie criterios asemeyaos a los del gochu ibéricu.