87 años del entamu de la Revolución del 34

La fuelga xeneral convocada a nivel estatal pal 5 d'ochobre llevó a un llevantamientu armáu n'Asturies que s'allargó hasta'l día 18.

Les órdenes llanzaes dende Madrid pal comienzu de la fuelga diéronse a última hora del día 4 d'ochobre del 1934, pa principiar coles movilizaciones na madrugada del 5. N’Asturies atacáronse dellos cuarteles de la Guardia Civil y declarábase n’Uviéu la República Socialista d’Asturies, que taría en pie per 15 díes, hasta’l 18 d’ochobre, tres negociar Belarmino Tomás la rendición de los revolucionarios, a lo que siguió una fuerte represión por parte del Gobiernu republicanu.

Unos 1.200 revolucionarios y civiles perdieron la vida nesti acontecimientu históricu que tuvo repercusión a nivel internacional, mentes qu’el númberu de militares, guardies civiles y guardies d’asaltu finaos taríen n’alredor de los 300. Uviéu, sede de numberosos combates, sufrió estrozos importantes.

Na semeya, trabayadores deteníos demientres la Revolución d'Ochobre del 34.