700 muyeres de tol Estáu aconceyen en Xixón pa preparar el 8-M

|
II Alcuentru Estatal del 8-M en Zaragoza

L'alderique feminista va centrase en "favorecer la participación y potenciar la xunión al rodiu oxetivos comunes".

El Centru Municipal Integráu Pumarín-Xixón Sur va acoyer el IV Alcuentru Estatal del 8-M mañana y el domingu. Cerca de 700 muyeres tán inscrites pa esta reunión feminista que va contar cola presencia d'activistes d'otros estaos.

Xixón, que toma'l relevu d'Elx, Zaragoza y Mérida, va servir de "puntu d'alcuentru y alderique sobre cómo organizar el coleutivu pa favorecer la participación y potenciar la xunión al rodiu oxetivos comunes". El trabayu de debate va facese "dende la busca de la inclusión de la diversidá y la pluralidá, una amuesa de respetu mutuu que carauteriza al movimientu feminista".

D'igual forma, va dedicase la estratexa a siguir pal 2019 y la convocatoria de fuelga xeneral pal 8-M, Día Internacional de la Muyer. El sábadu, primer xornada del alcuentru, va entamase dellos espacios de reunión, pa finar con una concentración a les 20.30 hores n'El Parchís (plaza Institutu) baxo'l lexa 'Si toquen a una, toquen a toes'.

El domingu van presentase les conclusiones del trabayu coleutivu y posteriormente va ponese la charra 'No es país para migretas', na que, ente otros temes, falaráse de la precarización del trabayu de cuidaos y de la situación llaboral de les emplegaes del llar.

Na imaxe, un momentu del alcuentru celebráu en xineru en Zaragoza.

AdxuntuTamañu
Image icon Programa IV Alcuentru Estatal del 8-M78.21 KB
Contador Estadistiques