70 años viviendo al otru llau de la mar

|
Participantes 'Señardá' 2018

“Ye de xusticia que la comunidá disponga de los medios necesarios pa que mientres dos selmanes puedan visitar la so tierra”. Doce mayores emigrantes y diez mozos viaxaron a Asturies gracies a los programes ‘Señardá’ y ‘Raigaños’, de manera respeutiva, en dalgún casu hasta 70 años depués de marchar a América.

Guillermo Martínez Suárez, conseyeru de Presidencia y Participación Ciudadana, recibió a tolos beneficiarios de dambos programes esta mañana xunto a la direutora xeneral d’Emigración y Cooperación al Desarrollu, Begoña Serrano. ‘Señardá’ ta destinada “a persones qu’emigraron hai munchos años”, destacando la situación “d’una persona que lleva 70 años ensin venir a Asturies, yá que dende’l día que marchó nun pudo tornar por motivos económicos”, al igual que los sos compañeros de viaxe.

Cuba, Arxentina, Venezuela y México son los países de los que proceden estos emigrantes que por fin pueden volver a ver colos sos güeyos la so tierra d’orixe. Mientres estos díes van poder averase al so llugar de nacencia y percorrer Uviéu, Xixón, Ḷḷuarca, Cuideiru, Llastres, Cangues d’Onís y Cabanaquinta, amás de conocer los museos de Belles Artes y Xurásicu, y l’Archivu d’Indianos.

Fíos y nietos d’emigrantes

Mentes, ‘Raigaños’ va dirixíu a toos aquellos descendientes d’asturianos que tengan ente 18 y 35 años, residan en cualquier estáu d’Europa o d’América, tengan la nacionalidá y nun cuenten con ingresos pa visitar Asturies. 33 persones solicitaron esti añu participar, de les que 10 recibieron el preste, cinco homes y cinco muyeres d’Arxentina (4), México (2), Chile (2), Venezuela, Cuba y Estaos Xuníos.

Contador Estadistiques