60.000 amasueles pa la ría de Villaviciosa

La Conseyería de Desarrollu Rural y Recursos Naturales va repoblar esti martes la ría de Villaviciosa con 60.000 amasueles. Éstes tienen un añu d'edá, con un tamañu d'ente 8 y 14 milímetros, y proceden del Centru d'Esperimentación Pesquera de Castropol.

La Direición Xeneral de Pesca Marítima encargase d'esti repoblamienu d'amasuela fina na ría de Villaviciosa, en concretu frente a la zona asitiada énte'l centru d'interpretación esti meudía. Los exemplares tienen una talla que va dende los 8 a los 14 milímetros y correspuenden a les puestes del 2015, polo que tienen un añu d'edá.

El procesu de llantadera, que va facese en collaboración col coleutivu de mariscadores que participen nel Plan d'Esplotación de Moluscos de la ría de Villaviciosa, supón una serie d'actuaciones de llimpieza del suelu, aireación del sustratu y protecición de la grana. Nesti plan tán censaos 26 mariscadores.

Ente’l 2006 y 2015, la conseyería lliberó na ría de Villaviciosa 2 millones d'unidaes d'amasueles dientro del so programa de caltenimientu y potenciación de los recursos marisqueros. Hai que recordar que l'estuariu de Villaviciosa permanez zarráu al marisquéu por problemes de contaminación.