50 llagares de 12 países van participar nel SISGA

Va celebrase del 25 al 29 en Xixón, cola esperada preba abierta'l sábadu 28.

El IX Salón Internacional de les Sidres de Gala (SISGA), eventu entamáu pala Fundación Asturies XXI, va acoyer nesta edición al menos a 50 llagares procedentes, amás d'Asturies, d'Estados Xuníos, Xapón, Portugal, Alemaña, Italia, Letonia, Estonia, Finlandia, Polonia, República Checa y España. En total son 12 los ellaboradores asturianos yá confirmaos, por 3 d'otres comunidaes autónomes y 35 de fuera del Estáu, cola posibilidá de que s'incorpore dalgún más nos díes próximos.

Toos ellos amosarán y ufrirán los sos productos más destacaos y innovadores nun congresu repletu d'actividaes tanto pa los productores como pal públicu nun eventu qu'amplia los díes de certame dos xornaes más yá que "un importante porcentaxe de los llagareros internacionales llegaben a Asturies con dellos díes d'antelación yá que, por mor a que ye ‘el país de la sidra’, queríen tener más tiempu p'afondar na cultura sidrera asturiana". Asina, van poder visitar llagares, pumaraes o facer entrevistes con responsables del Conseyu Regulador de la Denominación d'Orixe Protexida (DOP) Sidra d'Asturies.

La xornada más esperada pol públicu ye la preba abierta, prevista pal sábadu 28 na Colexata San Xuan Bautista, con una entrada de 6 euros, copa incluyida. Nella, de 12 a 21 hores, van poder conocer les bébores de los productores que participen nel SISGA, que van contar con puestinos diferenciaos onde atopar sidres esplumoses –brut, dulces, semiseques y rosaes–, sidres de xelu y de fueu, aguardientes, sidres ellaaboraes con dellos ingredientes, aperitivos de sidra y tercios o otros formatos.

Na imaxe, un momentu de la preba abierta del añu pasáu. Semeya obra de Flavio Lorenzo.