4.686 families van beneficiase de les ayudes al alquiler de viviendes

La convocatoria d'ayudes del 2016 algama los 6,18 millones tres habilitar un aumentu de 1,48 millones con respeutu a les cuentes afitaes pola prórroga presupuestaria.

El sofitu cubre'l 40 por cientu del preciu del arrendamientu, y la subvención media concedida, qu'abarca hasta un máximu de doce mensualides, xube a 1.318,97 euros. Estes ayudes, de les que van beneficiase 4.686 families, inscríbense nel marcu del conveniu de collaboración ente'l Ministeriu de Fomentu y el Gobiernu del país al traviés de la Conseyería de Servicios y Derechos Sociales pa la execución del Plan Estatal de Fomentu del Arriendu de Viviendes, la Rehabilitación Edificatoria y la Rexeneración y Anovación Urbanes 2013-2016, robláu'l 7 d'agostu del 2014.

La convocatoria contemplaba nun primer momentu un presupuestu de 4.700.000 euros, cantidá conseñada nel presupuestu prorrogáu, pero l'Executivu habilitó darréu una partida de gastu adicional de 1.480.000 euros cola fin de llegar a mayor númberu de persones No referío al perfil de les solicitúes, el gruesu de los pidimientos concentráse na zona central: Uviéu, Xixón, Avilés y Siero. Coles mesmes, hai un 25 por cientu de persones menores de 30 años y un 65 por cientu d'unidaes familiares na que la solicitante ye muyer.

El direutor xeneral de Vivienda, Fermín Bravo, destacó l'apueste del Gobiernu por ufiertar viviendes a precios algamadizos gracies al parque públicu del país, de casi 10.000 unidaes, y les ayudes al arriendu, que faciliten el contar con un llar a módicos precios. L'arriendu mediu que los beneficiarios abonen a los sos propietarios ye de 312 euros.