45 puestos participen nel VII Mercáu Tradicional de Santa Bárbola

Samartín del Rei Aurelio tamién acueye esta fin de selmana la primer representación de la III Amuesa de Teatru Cómicu.

L'Asociación Cultural y Medioambiental Los Pataqueros entama esti domingu la sétima edición del Mercáu Tradicional de La Cerezal-Santa Bárbola, que contará cola participación de 45 puestos d'artesanía y alimentación, talleres en vivo y actuaciones musicales. L'actividá va principiar a les 11 hores con una ufierta de lo más variada, con exhibiciones de trabayos fechos a mano pa la ellaboración de cestes, madreñes o ellaboraciones en fieltru, asina como de talla en piedra, madera o güesu, o costura con un telar antiguu. Tamién participará nel mercáu un ferreru y una esnatadora de lleche.

Los puestos d'artesanía van compartir espaciu colos d'alimentación, cola posibilidá d'adquirir productos ecolóxicos, dulces caseros y otres ellaboraciones como empanaes o bollos preñas. La mayoría de los participantes proceden del valle del Nalón, pero tamién d'otros conceyos del país.

A les 13 hores ta prevista la ceebración d'una misa na capiella del Sagráu Corazón n'honor a la virxe del Carmen. Darréu la Banda de Música de San Martín del Rey Aurelio va dar un conciertu, mentes que pela tarde, de magar les 17 hores, el turnu va ser pa la Banda de Acordeones de Villoria, a partir de las cinco. A la mesma hora, va haber una exhibición de tiru con arco a cargu del CBD Arqueros San Martín.

Ocho compañíes amateur en L'Entregu

El Teatru Municipal de Samartín del Rei Aurelio va acoyer dende mañana, y hasta'l 5 de payares, la III Amuesa de Teatru Cómicu. Ocho compañíes amateur van participar nesti certame con entraes a 5 euros y na que'l teatru costumista tien una presencia importante.

Trama va abrir esta edición cola representación de 'Una velada de sketchs', a lo que va siguir 'El molín coloráu', de Santa Bárbara (24 de setiembre); 'De piescos y escayos', de Rosario Trabanco (1 d'ochobre); 'Intemperie', d'Arte Arena (7 d'ochobre); 'No me llames Irene, que soy Bernardo', de Carbayín (14 d'ochobre); 'El cantar de los pipiolos', de Padre Coll (22 d'ochobre); 'El viudu alegre', de Traslluz (29 d'ochobre); y 'Hay motín, compañeras', de Les Filanderes (5 de payares). Toles funciones van principiar a les 20 hores.