"44 años depués ye’l momentu de da-y cumplimientu al artículu 3.2 de la Constitución n’Asturies", diz Iniciativa

La organización fai un llamáu a los partíos políticos pa que lleguen a un alcuerdu constitucional pal futuru de les llingües del país.

Coincidiendo col 6 d'avientu, Día de la Constitución, Iniciativa pol Asturianu apunta que "44 años depués de l'aprobación de la Carta Magna ye’l momentu de da-y cumplimientu constitucional al artículu 3.2 n’Asturies que significa la declaración d’igualdá pa tola ciudadanía independientemente de la llingua que llibremente quiera utilizar". "El resultáu de les elecciones de 2023 tien que ser el consensu, l’alcuentru y la suma de voluntaes pa llograr salvar l’idioma y da-y el mesmu rangu llegal que’l restu de les llingües d’España", añade la entidá que lleva utilizando en diferentes campañes, alcuentros y actos el so lema ‘Oficialidá, el camín constitucional de futuru pal asturianu’.

D'igual forma recuerda que "los valores constitucionales tamién declaren la igualdá ente tolos ciudadanos del Estáu español, independientemente de la llingua que s’utilice, amás de la non discriminación. Esto ye, en definitiva, garantizar la igualdá de tolos españoles. Si un falante de gallegu quier usar la so llingua en diferentes situaciones, ¿por qué non un asturfalante?".

Na semeya, actu celebráu ayeri na puerta del Congresu, en Madrid, con motivu del Día de la Constitución cola participación d'autoridaes y un exemplar de la Carta Magna en primer planu.