42 conceyos participen na campaña de Coxersa d'apoyu a la llimpieza d'espacios naturales

La novedá d'esti añu ye l'entamu d'un taller empobináu a un públicu familiar.

El Consorciu pa la Xestión del Residuu Sólido d’Asturies (Coxersa) pon en marcha un añu más la campaña d’apoyu a la llimpieza voluntaria n’espacios naturales, qu’implica a 42 conceyos. Los coleutivos y asociaciones interesaos n’entamar batíes pa la retirada de basura yá pueden pidir, al traviés de los conceyos, el patrociniu del Coxersa, qu’impulsa esta iniciativa dende’l 2013.

L’oxetivu d’esti programa ye sofitar a los ayuntamientos na llucha contra’l residuu acumulao en zones naturales d’usu públicu y na sensibilización de la ciudadanía. Pa eso, proporciona dellos materiales y recursos (bolses, contenedores, tresporte y tratamientu del restu, ente otros) a los coleutivos que s’organicen al traviés de los conceyos.

Ente les zones que pueden ser oxetu de les llimpieces patrocinaes atópense les siendes verdes y caminos n’espacios naturales, los merenderos y árees d’espardimientu n’espacios naturales, los calces y puntos de desembocadura de los ríos, les zones d'enllenes ivernales o de crecíes ocasionales, amás de les dunes y los requexos de les playes a los que nun tien accesu la maquinaria rodao de llimpieza habitual. Los conceyos que participen esti añu son Ayer, Avilés, Bual, Cabrales, Cabranes, Candamu, Cangues d’Onís, Cangas del Narcea, Carreño, Casu, Castrillón, Castropol, Cuaña, Colunga, Corvera, El Franco, Xixón, Gozón, Ibias, Ḷḷena, Llanes, Mieres, Nava, Navia, Noreña, Uviéu, Parres, El Valle Baju de Peñamellera, Piloña, Ponga, Ribeseya, Riosa, Salas, Santu Adrianu, Siero, Sotu’l Barcu, Tapia, Tinéu, Valdés, A Veiga, Villaviciosa y Villayón.

Como novedá d'esta campaña, COXERSA ufierta a los participantes una actividá empobinada al públicu familiar. Trátase d’un taller sobre los efectos del microplásticu nel mediu ambiente, al traviés del xuegu y la investigación, que se puede solicitar al traviés de la web del consorciu.