40 Años del Estatutu d'Autonomía

Esti xueves 30 d’avientu cúmplense cuarenta años dende que'l rei d’España, Juan Carlos I, firmó en Baqueira-Beret la Llei orgánica d'Estatutu d’Autonomía p’Asturies. La Llei Orgánica 7/1981 publícase nel BOE el 11 de xineru de 1982, entrando en vigor el 31 de xineru.

Al vinir esti estatutu a travíes del artículu 143.1 de la Constitución Española, esti cartafueyu sirvió pa  la recuperación de les instituciones y símbolos históricos, como la Xunta Xeneral, himnu, o la bandera, pero taba curtiu en competencies. Ansina tuvo delles reformes en 1991, 1994 y la cabera en 1999 onde cambió'l títulu d''Estatutu d'Autonomía p'Asturies' a 'Estatutu  d'Autonomía del Principáu d'Asturies'.

L'asignatura pendiente dende'l so aniciu foi'l tratamientu de la llingua asturiana, y del gallego-asturiano. Esti asuntu pudo llegar a nun aprobar l'Estatutu, al salir na so redaición inicial dende Asturies col artículu:

"El bable, como llingua específica d'Asturies, gozará de protección. Se promoverá'l so usu, la so difusión nos medios de comunicación y la so enseñanza, respetando en too casu, les variantes locales y la voluntarieda nel so deprendimientu."

Esta redacción foi torgada nel Congresu Español y pala so aprovación tuvo que ser recortada, quitando la referencia "como llingua específica de Asturies". Ye importante destacar que les actes d'otres comisiones sobre l’Estatutu d’Asturies tienen colgaes les actes y l’audiu de los conceyos na web del Congresu, d’esta discusión nun s’atopamos.

La causa d'esta eliminación foi que nun se reconociese al asturianu como llingua nel testu, y d'esta manera torgar cualguier reclamación ante'l Tribunal Constitucional pola no declaración d'oficialidá del asturianu como afita la Constitución.

Anguaño paez que ta abriéndose la puerte a una nueva reforma estatutaria onde uno de los puntos, por nun dicir el principal, ye la oficialidá del asturianu y del gallego-asturianu. Pero nun va ser fácil, de primeres, necesítesen los 3/5 de la Xunta Xeneral y nun tan seguros. Amás, el modelu d'oficialidá "amable", como la nomen dende la FSA, de momento ye solo un nome. Y pa finar, los plazos de tramitación dientro d'esta llexislatura tan mui axustaos, pudiendo dexalo too pa práu según la composición de la prósima Xunta Xeneral y Congresu español.

Semeya: Sede de la Xunta Xeneral del Principáu d'Asturies