32.470 fármacos repartiéronse n'otres comunidaes cola receta electrónica interoperable

Esti modelu permite a los asturianos recoyer la so medicación nes farmacies d'autonomíes que cuenten tamién con esti sistema.

La puesta en marcha de la receta electrónica interoperable permitió'l repartu n'otres comunidaes, nel primer semestre del añu, de 32.470 fármacos prescritos en centros de salú del país a pacientes asturianos. Castilla y Lleón, Comunitat Valenciana, Galicia, Canarias y Cantabria son, nesti orde, onde más merques hebo, anque se rexistraron movimientos en toles autonomíes incorporaes al proyeutu, esto ye, toes sacante la Comunidad de Madrid y delles farmacies de Catalunya.

Asturies sumóse a últimos del 2017 a esti sistema qu'asegura la prestación farmacéutica nel Sistema Nacional de Salud (SNS), independientemente de l'autonomía na que s'atope l'usuariu. Asina una persona movida fuera del país que precise dalgún tratamientu prescritu nel so centru de salú va poder recoyelu en cualquier botica del territoriu nel que s'atope, siempre que cuente tamién con esti serviciu.