25 de payares: "Poles nueses vides"

Asturies vive un Día Internacional de Desaniciu de la Violencia contra la Muyer con actos en tol país y una manifestación n'Uviéu.

El 25 de payares vien entamándose dende'l 1981, xornada que recuerda l'asesinatu de trés hermanes, les Mirabal, activistes polítiques, en República Dominicana nel 1960 pol réxime de Trujillo. Una fecha que sirve pa rescamplar esti grave problema y pa concienciar a la sociedá sobre'l mesmu nun añu nel qu'hebo que llorar 1 asesinatu machista, el de Teresa Aladro, de 48 años, nel mes de mayu en La Pola Llaviana.

Como ye vezu, el movimientu feminista asturianu movilízase alredor d'esti día, con delles actividaes que tienen como exa central una manifestación n'Uviéu a les 19.30 hores con salida na Estación del Norte (RENFE). Una convocatoria na que, según denuncien, el gobiernu municipal de PP y Ciudadanos punxo torgues.

"Nun nos concede los permisos pa poder instalar megafonía y ocupar suelu públicu nel Día Internacional en contra de les violencies machistes. La comunicación a Delegación de Gobiernu pal percorríu de la manifestación pela ciudá trecurrió ensin problema nengún. Sicasí, l'equipu de gobiernu llocal tuvo poniendo problemes y escuses cola decoración navidiega durante tola selmana hasta que finalmente, el día enantes de la manifestación, comuníquennos que nun nos dan permiso en nenguna plaza de la ciudá", esplica'l coleutivu Asturies Feminista 8M.

"El Conceyu d'Uviéu coles sos aiciones amuesa que ta en contra del feminismu y de la igualdá", afirmen al tiempu que caltienen la convocatoria vespertina baxo'l lema 'Poles nueses vides. Xuntes y a la ofensiva'. Pela mañana, al meudía hai convocaes concentraciones nes places de les cases de conceyu del país y UXT y CC OO entamen otra a la mesma hora n'Uviéu nel puntu onde conflúin les cais Santa Teresa, Cervantes y l'avenida de Galicia.

El Gobiernu, abolicionista

Esti añu dende'l Gobiernu súmense a esta reivindicación con un mensaxe abolicionista. El lema emplegáu ye, en castellanu, '25P. Contra la prostitución, la pornografía y la trata.