25 de mayu: Cúmplense 215 años de la proclamación de soberanía de la Xunta Xeneral

El 25 de mayu del 1808 la Xunta Xeneral proclamóse soberana rebelándose contra'l dominiu francés. Esti xueves cúmplense 215 años d’esa fecha histórica pal país demandada por un sector de la sociedá pa celebrar el Día de la Nación Asturiana y escaecida poles instituciones per décades hasta esta llexislatura, cuando’l Gobiernu entamó a conmemorala y a referise a ella como’l Día de la Bandera.

La campaña eleutoral engulla tola actividá estos díes, polo que nun s’entamó un actu institucional nesta ocasión nel Palaciu del Conde de Toreno como nos dos años anteriores. Les iniciatives dende l’Executivu llendáronse al recibimientu d’Adrián Barbón esta mañana a un grupu d’escolines y escolinos d’Infantil y Primaria del Colexu Público Regino Menéndez Antuña, de Llangréu, que-y fixo entrega d’un llienzu cola bandera d’Asturies y güei espublizóse la octava y última entrega del webcómic ‘Asturies. L’orixe d’una bandera’ sobre los acontecimientos al rodiu del 25 de mayu del ilustrador Javi de Castro, con versiones n’asturianu, gallego-asturiano y castellanu.

Dende la sociedá civil, especialmente dende l’asturianismu, y dende delles formaciones polítiques –Andecha Astur, por exemplu, entama a les 20 hores una ufrienda floral na Corrada del Obispu d’Uviéu y Podemos refierse a la xornada na que celebra l’actu central de campaña d’esta tarde a les 19 hores na xixonesa sala Albéniz como Día d’Asturies– son munches les referencies que se tán faciendo dende la madrugada a esta fecha de la que se cumplen güei 215 años. Una xornada na que la Xunta Xeneral declaróse soberana, rebelándose contra l’exércitu francés, lo que llevó a la organización d’un exércitu asturianu propiu y al unvíu d’embaxadores a Inglaterra pa pidir sofitu na llucha contra l’exércitu francés invasor.

Amás supunxo la creación de la bandera d’Asturies, similar a l’actual, que llevaba la cruz de la victoria y el lema ‘Asturias xamás vencida’. Ésta foi la mayor herencia del 25-M y Barbón, qu’apuesta por caltener el 8 de setiembre, Día de la Santina, como Día d’Asturies, vien defendiendo estos años esti xornada como’l Día de la Bandera.

L’orixe de la bandera del país ta nun informe de Gaspar Melchor de Xovellanos a pidimientu del marqués de Camposagrado nel 1794, nel que l’ilustráu xixonés, tres analizar diferentes posibilidaes, propón tomar como símbolu’l mesmu que’l de la monarquía asturiana: la cruz de la victoria. Na so propuesta ésta sería platiada, coles lletres alfa y omega, y con un fondu colloráu o azul.

Años más tarde, tres la declaración de soberanía del 1808, la Xunta Xeneral, tresformada en Xunta Cimera, entiende de la necesidá d’adoptar un símbolu, una bandera, pa lo que toma como base la propuesta por Xovellanos, escoyendo finalmente fondu azul.

N’Asturies.com, pa conmemorar esta fecha, recuperamos dellos artículos, gráficos y informaciones que viniemos espublizando otros 25-M anteriores:

• Cuando fuimos soberanos nel XIX
• La bandera, la mayor herencia del 25 de mayu
• Los poemes de Fernán-Coronas sobre la bandera
• ¿25 de mayu, 8 de setiembre o entrambes?
• “El 25 de mayu ye una fecha claramente reivindicable por tol abanicu políticu”, apunta Zapico