25 colectivos axúntense por una Asturies sostenible

Decenes de persones a títulu individual y más de 25 colectivos de numberosos conceyos d'Asturies decidieron axuntase pa construyir una sola voz y una suma d'esfuerzos na reivindicación d'un modelu de desarrolly sostenible p'Asturies, pa lo que roblaron la creación de la "Agrupación de Colectivos Asturianos" (ACA).

La creación d'esti ensame qu'axunta mayormente a grupos ecoloxistes y asociaciones de vecinos de toa Asturies afectaes por distintes infraestructures como autopistes, banzaos o planes urbanísticos agrsivos xustifícase como un intentu d'atropar esfuerzos pa oponese a la "voráxine desarrollista" y facer un apueste por un modelu de desarrollo sostenible que nun estroce los alores naturales del país. La plataforma preséntase tamién como un "apueste pol modelu participativu" nel qu'habitantes de pueblos y ciudaes "puean dicir na construcción del so futuru y nel que nun se-yos oculte información nin se-yos nieguen o caciplen los procesos democráticos".

L'Agrupación acabante de crease va promover nos próximos meses delles acciones y iniciatives, incluyndo movilizaciones pa estes pascues, rescamplando la iniciativa simbólica de lantar un árbol vecinal el 17 d'avientu en delles playes asturianes como un xestu pa pidir cordura y de bona voluntá nes actuaciones polítiques. Ente les midíes yá de más fondu que cuenten con tomar a mediu plazu inclúin la reclamación énte la Comisión d'Urbanismu y Ordenación del Territoriu d'Asturies (CUOTA) d'una presencia na mesma del movimientu vecinal. Por de pronto, l'agrupación, na que tan presentes amás de grupos ecoloxistes como ANA, Coordinadora Ornitolóxica d'Asturies ente otros y asociaciones veciales como Cambiu XXI de Muros de Nalón, Sueve Verde de Colunga, la Union Vecinal de Lieres-Siero, el movimientu asociativu vecinal de Valdes, la Plataforma de Defensa Rural de Xixón, o l'Asociacion pola defensa del mediu rural de Navia-Aderna, va celebrar un conceyu abiertu'l día 2 d'avientu nel pueblu d'Outur (Valdés) nel marcu d'unes xornaes culturales.