24 nuevos positivos por coronavirus

La Conseyería de Salú confirmó güei 24 casos positivos de coronavirus, once de los cualos tán rellacionaos colos biltos declaraos en Llanes y Castropol, el rellacionáu con un viaxe d'estudiantes a Málaga y el d'un chigre de Xixón.

Tres nuevos casos alcen a 7 el númberu d'afectaos nel biltu declaráu ayeri nos establecimientos La Terraza de Laura y l'escuela de surf Skull, en Llanes.

Pela so parte, el de chigre xixonés suma 21 afectaos, en computando 5 nuevos positivos nes postreres 24 hores. Amás, con otros 2 casos yá lleguen a 15 los contaxaos nel biltu del viaxe d'estudiantes a Málaga.

De la mesma, un casu declaráu en Castropol aumenta hasta 7 los positivos venceyaos a esti biltu na área sanitaria I.

Per otru llau, otros 8 positivos son contactos estrechos de casos conocíos, que yá taben n'aislamientu. Coles mesmes, otros 3 de los positivos comunicaos al Ministerio de Sanidad vienen de Madrid y Aragón.

El Serviciu de Vixilancia Epidemiolóxica ta investigando los 2 casos restantes pa establecer el so venceyu epidemiolóxicu.

Los contaxaos presenten síntomes leves y tán n'aislamientu nes sos cases.