22.296 persones pasaron pel puestu d'información d’Asturies en FITUR

Asturies acudió un añu más a la Feria Internacional de Turismo (FITUR), que se celebró en Madrid ente’l miércoles y el domingu, onde instaló un puestu nuevu inspiráu na campaña ‘Torna al Paraísu’. Ésti recibió un total de 22.296 visitantes, con aiciones promocionales paraleles que llegaron a 200.000 persones.

Mientres los cincos díes de duración de la feria dedicada al turismu más importante del Estáu y una de les más destacaes d’Europa, cola participación de países y rexones de tolos continentes, l’escenariu del puestu d’Asturies acoyó 37 presentaciones de productos turísticos, tanto del Gobiernu como d’ayuntamientos y empreses. Dalgunos d’estos actos, como la presentación de Cuadonga Centenarios 2018, la firma del alcuerdu pa la organización del II Congresu Mundial sobre Destinos Turísticos Intelixentes y la del productu Mines d’Asturies, superaron el centenar d’asistentes.

Col oxetivu de convertir el puestu nun centru de negocios, celebráronse más de 135 reuniones con axencies de viaxes, empreses de comercialización, oficines de turismu nel estranxeru, guíes, medios y axencies de comunicación. Un centenar d’estos alcuentros entamáronse nel espaciu cedíu a les empreses asturianes, que s’amplió en 30 metros, pa impulsar la comercialización y la promoción d’Asturies como destín turísticu.

Amás, el plan de comunicación diseñáu pola Conseyería d’Emplegu, Industria y Turismu pa divulgar les aiciones promocionales presentaes nel certame permitió llegar a más de 200.000 persones, tanto al traviés de les actividaes y consultes d’información feches nel propiu puestu como en redes sociales, onde se xeneraron 1.300 publicaciones cola etiqueta #AsturiasenFitur. Polos mostradores d’información pasaron 22.296 persones, mentes que pel salón paralelu, FITUR LGTB, atendióse a otres 1.051.

Otros datos destacaos son que más de 2.141 persones utilizaron la zona multisensorial pa sentir soníos de la naturaleza y disfrutar del arume a mazana y a yerba recién cortao; que s’imprentaron más de 2.700 semeyes nel Fotospot, espaciu nel que’l públicu podía fotografiase con imáxenes d’Asturies de fondu; o que les entraes del perfil de Turismu d’Asturies en Facebook llegaron a más de 180.000 usuarios de la rede social. “Estos datos estadísticos confirmen l’ésitu algamáu” por Asturies en FITUR, destacó’l conseyeru Isaac Pola tres dar a conocer estes cifres.

Na semeya, el conseyeru de Presidencia y Participación Ciudadana, Guillermo Martínez Suárez, na presentación del programa de Cuadonga Centenarios 2018, ún de les 37 qu'acoyó'l puestu d'Asturies en FITUR. Imaxe obra d'Armando Álvarez.