200 intelectuales firmen escontra Lada-Velilla

Esti sábadu preséntase en Lleón el manifiestu d'intelectuales y profesionales que s'oponen a la llinia d'alta tensión que ta proyectada ente Lada (Llangréu) y Velilla del Río Varrión (Palencia). Esta infraestructura, que tendría de sacar nun futuru la corriente de les centrales térmiques que tan proyectaes n'Asturies, llevando'l fluidu hasta la meseta, ta nel güeyu de la polémica a una parte y otra de la cordelera dende que se conociere yá na primavera de la esistencia d'un trazáu nuevu pa la mesma qu'echaba les torretes y los cables pelos montes del altu Ayer, desaniciando l'antiguu trazáu que pasaba pel medio del Parque Natural de Redes y multiplicando por cuatro la capacidá orixinal de la llinia.

L'alcuerdu que roblaba la construcción de la llinia nueva firmóse n'abril nel Ministeriu d'Industria y el mesmu ministru Montilla dixo que "esti alcuerdu benefícianos a toos". Anque dende REE adelantaben que la llinia diba diseñase partiendo de cero y cumpliendo con toles esixencies en materia de mediu ambiente, la oposición a esta infraestructura organizóse bien ceo, primero a la otra parte del cordal, onde los vecinos de la montaña lleonesa nun tardaron n'amestase como Plataforma contra la llinia. Na parte asturiana, los grupos ecoloxistes foron los primeros en reaccionar, argumentando contra lo innecesario de la llinia, pero tamién los vecinos y el Conceyu d'Ayer, que ta estudiando cada movimientu de la empresa promotora y que nun descarta entamar acciones llegales contra la mesma. Nesti sentíu, el conceyal d'urbanismu ayerán dixo que la decisión de tirar la llinia per Ayer foi arbitraria y que les torretes van francer el conceyu en en dos. El conceyu va entamar tamién una campaña dende'l mes de setiembre consistente n'aprovechar acontecimientos deportivos que se desarrollen n'Ayer pa facer pública la refuga a la infraestructura.

Mientres el conceyu ayerán defende que s'estudien otres alternatives pa la llinia, los movimientos vecinales d'oposición a Lada-Velilla dende una y otra parte de los montes va dar mañana sábadu un güelpe d'efectu cola presentación d'un manifiestu d'intelectuales y profesionales opuestos a la construcción de la llinia. L'escritor lleonés Julio Llamazares, autor de "La lluvia amarila" o "Lluna de Llobos" o la periodista y escritora asturiana Ángeles Caso "Un largo silencio" tan ente la llista de firmantes d'un manifiestu que tamién soscribe Juan Rodríguez Lozano, abogáu y padre del Presidente del Gobiernu José Luis Rodríguez Zapatero. El compositor Cristóbal Halffter o l'espertu en medios de comunicación asturianu Juan Cueto tan tamién na lista de firmantes que va presentase mañana en Hostal de San Marcos.

Asturies tien anguaño dos llinies de 400.000 KV con Castiella y Lleón y otres dos de 220.000 KV. con Cantabria, esistiendo amás un proyectu pa da-y más potencia a la llinia esistente ente La Corredoria (Uviéu) y Grandas de Salime pa llevala hasta Mondoñedo en Galicia, xubiéndo-y amás la capacidá hasta los 400.000 KV. Les voces contraries a Lada -Velilla dicen que la so entrada en serviciu va producise nun contestu futuru en que los llugares onde agora se consume corriente asturiano van pasar tamién a ser xeneradores de corriente, colo que l'escedente de producción d'Asturies va tener mala salida. La molestia a los vecinos, los riesgos a la salú y l'estropiciu paisaxísticu faen el restu pa que la llinia nun cuente col preste de los conceyos qu'atraviesa, una aopinión que l'escritor Julio Llamazares resumió en declaraciones al Diario de León argumentando qu'hai qu'esixí-yos a los políticos que "nun actúen sólo de palabra" y que "nun puede imponése-yos a los más débiles lo que nun quieren otros" en referencia al trazáu previstu pa una llinia que nun va dexar beneficiu nos llugares qu'atraviese.