188 casos nuevos de COVID-19 na xornada previa a la vuelta a la fase 2 modificada

El miércoles hebo que llamentar 3 muertes.

La xornada previa a la vuelta d'Asturies a una fase 2 modificada pa frenar l'espardimientu del coronavirus SARS-CoV-2 dexó 188 contaxos, 190 na serie oficial pola incorporación de dos positivos correspondientes al entamu de la selmana, polo que'l total de casos confirmaos por PCR queda en 7.501. De los diagnosticaos ayeri, 4 tuvieron que ser hospitalizaos.

El Serviciu de Salú del Principáu d'Asturies (SESPA) fixo 3.954 pruebes PCR, polo que la tasa de positividá s'asitia nel 4,7 por cientu. Un día más, avérase al 5 por cientu que marca la Organización Mundial de la Salú (OMS) pa tener controlada la pandemia, llende qu'ayeri se llegó a superar: un 5,87 por cientu nuna xornada con 183 contaxos.

Ayeri perdieron la vida con COVID-19 un total de 3 persones, un home de 62 años y dos muyeres de 100 y 88 años que yeren usuaries d'un centru residencial sociosanitariu. Dende l'entamu del andanciu acumúlense 370 muertes.

No que se refier a hospitalizaciones, hai 24 pacientes na UCI, ún menos que'l martes, y 163 en plan, 7 más. Na xornada diéronse dos altes epidemiolóxiques, que ponen el total de curaciones en 2.330.