La empresa americana ProQuest ta faciendo un descomanáu trabayu de dixitalización consistente en escaniar tolos númberos enteros de los periódicos The New York Times, The Wall Street Journal, The Washington Post y The Christian Science Monitor. Depués d'añu y mediu de trabayu, El New York Times, que yá ta enteru escaniáu, ye'l primer periódicu n'entrar a la base de datos del Proyectu de Periódicos Históricos. Namás los númberos de la dixitalización del NY times yá son p'ablucar a cualquiera: 3.400.000 páxines y 25 millones d'artículos qu'encadarmen los 150 años d'esti periódicu fundáu en 1851. Eso ensin tener en cuenta los problemes pa convertir a testu les microfiches más vieyes, astraes de rayonazos y comíes del tiempu. Los periódicos dixitalizaos van tenelos pa consulta en biblioteques y universidaes del país, anque cualquiera podrá suscribise al web de ProQuest, qu'invita a visitar una demostración de como funciona la base de datos