14 minutos y 6 segundos, el tiempu pa la llingua asturiana en RPA

Esti miércoles, 13 de febreru, celébrase'l Día Mundial de la Radio. L'asturianu malpenes tien presencia na canal pública.

Nesta xornada entamada pola UNESCO, nesti 2019 baxo'l lema 'Diálogu, tolerancia y paz', Asturies.com decidió cronometrar el tiempu que tuvo la llingua asturiana nos espacios fixos de la RPA. En total foron 14 minutos y 6 segundos, lo que duró'l boletín de noticies del meudía que da n'asturianu, por iniciativa propia, el periodista Naciu Varillas.

Y ye qu'ésti ye l'únicu güecu que tien anguaño l'idioma na canal pública, sacantes dalguna intervención esporádica de dalgún collaborador o convidáu en dalgún de los munchos programes de la parrilla, toos en castellanu. En total, poco más d'una hora a la selmana, de llunes a vienres, una cifra bien probe pa una emisora que tien ente los sos fines la divulgación de la llingua asturiana.

Música del país

Otru aspeutu mui criticáu ye la falta de música del país n'asturianu na programación de la RPA. En redes sociales inclusive, aprovechando esta xornada, ta entamándose una campaña aniciada pola tienda en llinia Music{a}sturiana baxo la etiqueta #NaRPAMusicaNAst que ta algamando repercusión.

Nel #DiaMundialDeLaRadio facemos alcordanza de Radio Sele. Una emisora que demostró que facer radio 100% n'asturianu yera posible #narpamusicanast

— Xunta #oficialidá (@exunta) 13 de febrero de 2019

Porque pa sentir a @Martisima_SoyYo yá tán el restu #NaRPAMusicaNAst pic.twitter.com/TCBs9QIErg

— Damián Barreiro (@damiandbm) 13 de febrero de 2019

Porque sentir música n'asturianu n'Asturies sedría lo normal #NaRPAMusicaNast

— Carmen Eva Fernández (@CarmenEvaFernnd) 13 de febrero de 2019

Por una industria musical asturiana. Respetu para la música propio y ayeno #NaRPAMusicaNAst

— Slum Suit (@SlumSuit) 13 de febrero de 2019

#NaRPAMusicaNAst porque ye la canal mediante la cual podría promocionase música de calidá pero desconocía pal gran públicu al nun entrar nos circuitos comerciales.

— Xrd (@xurde_lon) 13 de febrero de 2019