1.200 vacunes de Moderna refuercen la campaña n’Asturies

Depués de l’almininistración hasta’l miércoles de 25.278 vacunes de Pfizer/BioNtech, de les 35.420 recibíes –esto ye, un 71,4 por cientu–, Asturies cuenta yá coles 1.200 primeres de la farmacéutica estauxunidense Moderna. Esti xueves entren a valir les restricciones nueves, con una modificación nel horariu del repartu a domiciliu.

La campaña de vacunación refuérciase cola llegada de la vacuna de Moderna. A primer hora de la tarde d’ayeri llegaba a Asturies el primer llote, compuestu por 1.200 dosis, que se van alministrar xunto coles de Pfizer/BioNtech al personal sanitariu que trabaya en primer llinia contra la COVID-19 yá fináu’l llabor colos internos en residencies y cuidadores, pendientes agora de la puesta de la segunda y última dosis a partir del llunes una vegada pasaos los 21 díes.

Asturies sigue llevando un bon ritmu de vacunación, col 71,4 por cientu de vacunes puestes a fecha d’ayeri, perriba de la media estatal, que s’asitia nel 52,7 por cientu y escosando toes les recibíes nes dos primeres selmanes –el Ministeriu de Sanidá unvíales los llunes–. Namái Melilla, con un 100 por cien de les 1.005 recibíes, Ceuta (81,6 por cientu) y Comunitat Valenciana (77,5 por cientu) presenten un porcentaxe mayor.

A les 23.30 hores

Mentanto avanza la inmunización de la población, güei entren a valir les restricciones nueves pa tratar de frenar l’espardimientu del coronavirus SARS-CoV-2 nesta tercer fola que yá azota’l país, con una incidencia de 221 y xubiendo. La hostelería y tolos comercios han pesllar a les 20 hores, con toque de queda adelantáu a les 22 hores.

Sicasí, el Gobiernu modificó la resolución del llunes en dos ocasiones. Ayeri p’ampliar la venta a domiciliu de comida de les 22 a les 23.30 hores y güei pa prohibir el consumu de tabacu en terraces.

Éstes restricciones son les más dures puestes n’Asturies dende la desescalada. El deséu del Executivu asturianu ye'l d'imponer un confinamientu domiciliariu que niega, otra vegada más, el Gobiernu estatal, polo que’l presidente Adrián Barbón tornó a llamar a la población al “autoconfinamientu” nestes xornaes claves de la tercer fola de la pandemia.