10-P: echa a andar la campaña eleutoral más curtia de la Democracia

Na medianueche del xueves al vienres va echar a andar la campaña eleutoral más curtia de la Democracia: ocho díes de llargor. Los candidatos de 13 partíos políticos o coaliciones van pidir el votu a les asturianes y asturianos hasta’l vienres 8 de payares de cara a la repetición eleutoral convocada pal domingu 10.

La reforma de la Llei Orgánica del Réxime Eleutoral Xeneral acurtia de 15 a 8 díes la campaña eleutoral nel casu de reforma eleutoral, polo que la que comienza esta nueche conviértese na más curtia de la historia dende la llegada de la Democracia al Estáu. Esta modificación fíxose nel 2016, con Manuel Rajoy como presidente de Gobiernu en funciones y con una posible tercer repetición eleutoral nel horizonte que l’astención del PSOE evitó, polo qu’entra nesta ocasión en vigor.

Adriana Lastra (PSOE), Paloma Gázquez (PP-Foro), Sofía Castañón (Xuníes Podemos), José Ignacio Prendes (Ciudadanos-Partido de la Ciudadanía) y José María Figaredo (VOX), los cinco candidatos que defenden escañu esti 10-P, van pidir el votu a les asturianes y asturianos xunto colos de les otres 8 formaciones que se presenten al Congresu y al Senáu: Andecha Astur, PACMA, PCTE, PUM+J, Partido Humanista, Recortes Cero-Grupo Verde, PCPE y Más País-EQUO. Dalgunos tendrán el sofitu estos díes de los sos líderes estatales, tando prevista la visita al país en campaña del socialista Pedro Sánchez, el popular Pablo Casado y l’ultraderechista Santiago Abascal.

Na semeya, Lastra, la candidata más votada n'Asturies, nel tradicional momentu de la pegada de cartelos de la campaña anterior.