“Ye una satisfaición mui fuerte trayer a Asturies la esposición 'Máscara Ibérica'", afirma Progestur

Hélder Ferreira, presidente de Progestur, señaló que “ye una satisfaición mui fuerte trayer a Asturies la esposición ‘Máscara Ibérica”. La muestra va tar abierta al públicu hasta’l 30 de setiembre nel Muséu del Pueblu d’Asturies.
 
Xixón ye la siguiente parada d’esta esposición itinerante que yá pasó per Lisboa, Terceira, Zamora, Porto, Coimbra y Faro, y que pronto va dar el saltu a América. “Esta muestra tien el so orixe nel llibru ‘Máscara Ibérica’, del que s’editaron dos tomos –yá se ta trabayando nel terceru”, esplica Ferreira, que nun oculta la mui fuerte “satisfaición” que-y produz qu’esta iniciativa aporte a Asturies dende Portugal gracies a la intermediación de l’Asociación pa la Recuperación de Los Sidros y Les Comedies ‘El Cencerru’. Nella pueden vese semeyes de decenes de mazcaraes vives de la Penísula Ibérica, asina como una amuesa de traxes reales que s’utilicen nestes fiestes populares, ente elles la de Los Sidros de Valdesoto y la del Guirria de San Xuan de Beleño. Amás, tán espuestes semeyes d’estes dos mazcaraes asturianes y d’Os Reises del Valledor y de Tormaleo.
 
Na presentación celebrada na Casa de los Valdés, edificiu qu’acueye esta muestra, Ferreira esplicó’l llabor importante que fai l’asociación cultural Progestur na recuperación d’este mazcaraes “que se celebren de manera principal dende’l solsticiu d’iviernu al antroxu, anque hai dalguna que tien llugar pal Corpus Christi y pa San Xuan”, rellata’l tamién coordinador de la muestra. El portugués fixo referencia a la repercusión tán importante que tienen los dos festivales alredor d’esta tradición que se celebren en Lisboa en mayu y en Zamora en setiembre o ochobre: “Nel del Lisboa d’esti añu acudieron 400.000 persones y, per dos hores, pudo vese per tol mundu en direutu al traviés del canal internacional de la televisión de Portugal”, comenta Ferreira, que destaca’l “potencial fuerte que tien estes mazcaraes en términos económicos y turísticos”.
 
Collaboración que s’estiende tamién al Festival Arcu Atlánticu
 
Xosé Manuel Riesgo, direutor de la Fundación Municipal de Cultura, Educación y Universidá Popular, calificó a Portugal de “tierra hermana” y apuntó que la propuesta de trayer la esposición ‘Máscara Ibérica’ a Xixón foi l’entamu d’una rellación con Progestur que fixo que’l primer Festival Arcu Atlánticu, que va desendolcase na ciudá del 21 al 29 de xunetu, tuviera dedicáu a Portugal. Asina, amás d’actividaes venceyaes cola música o la lliteratura, ente otres munches, Progestur va trayer a Campu Valdés a más d’una decena d’entidaes y rexones portugueses que van mostrar la cultura y la gastronomía del país lusu. Al respeuto, Carlos Rubiera, conceyal d’Educación, Cultura, Mocedá y Festexos, destacó qu’espera que “dientro de 8 o 10 años tea afitada una rellación y un intercambiu comercial y económicu con tolos países del arcu atlánticu”.
 
Tamién acudió a la inauguración de la muestra Eduardo Martínez Llosa, alcalde de Siero, ún de los conceyos que más ta collaborando na recuperación de les mazcaraes d’iviernu con tanta tradición nel país y, en concreto, de Los Sidros y Les Comedies. “Tamos encantaos de tar equí representando a los vecinos de Valdesoto”, aseguró pa depués afirmar que “les mazcaraes ye dalgo que tenemos que potenciar”.