Davyth Hicks:“Ye clara la discriminación sistemática contra les llingües non castellanes”

Davyth Hicks, secretariu xeneral d’ELEN, nun duldó n’acusar al Estáu español polos ataques a les llingües diferentes al castellanu. La situación del asturianu va tar presente esti xueves na ONX.

Según esplicó énte la prensa en Genèva por motivu de la intervención prevista mañana nel XXIX Conseyu del Altu Comisionáu de Derechos Humanos de la Organización de Naciones Xuníes (ONX), l’informe fechu por European Language Equality Network (ELEN) –organización d’ámbitu européu que trabaya na promoción de les llingües minoritaries–, que recueye datos del 2007 al 2013, amuesa “munchos casos de discriminación a posta nel terrén llingüísticu a falantes de catalán, vascu, gallegu, aragonés y asturianu”, ente los que cita inclusive multes policiales y humillaciones nos xulgaos por parte de maxistraos.

“Considerando la llarga cantidá d’evidencies detallaes nel informe, ye clara la discriminación sistemática contra les llingües autóctones non castellanes nel Estáu español, una discriminación que se tornó institucionalizada”, continuó Hicks.

Mentes, el vicepresidente d’ELEN,  el valencianu Ferran Suay afirmó que “la discriminación nel Estáu español tanto contra les llingües co-oficiales, como pa col aragonés y l’asturiau, ye inaceptable dafechu y ha de cesar inmediatamente”, pa darréu esixir a la ONX que tome les midíes oportunes pa solucionar esti asuntu.

Iniciativa pol Asturianu, presente en Genèva

La llingua asturiana va tar representada mañana na ONX na sesión na que van tar presentes l’Altu Comisionáu de Derechos Humanos y representantes del Gobiernu español, por Iniciativa pol Asturianu, en concreto pol presidente d’esta asociación, Inaciu Galán, y la responsable d’Activismu nes Redes Sociales, Marissa Bordallo. La delegación ibérica complétenla Suay (Acció Cultural del País Valencià), el gallegu Marcos Maceira (presidente de la Mesa pola Normalización Lingüística) y les catalanes Rosa de les Neus Marco y Marga Payola (Plataforma per la Llengua).