“Tradiciones como’l nataliegu o los aguilandos son fáciles de recuperar”, afirma Álvarez Peña

Les tradiciones asturianes en feches navidiegues protagonizaron la charra d’esti mes d'Ástura. Álberto Álvarez Peña esplicó en qué consisten el nataliegu y los aguilandos, costumes a piques del desaniciu  “fáciles de recuperar”.

Nun primer momentu de la conferencia ‘La recuperación de les tradiciones asturianes de Navidá’, nel que tamién participó’l coleutivu ‘Reciella. Families pol Asturianu’, representáu nel Atenéu Obreru de Xixón por David Guardado, l’etnógrafu esplicó que la Navidá, tal y como agora s’entiende, nun tien nada que ver cola tradición, “al igual qu’asocede col Antroxu”, al que comparó col Carnaval de Cádiz. Asina, señaló que nin la ellaboración de belenes, “una tradición urbana y elitista”, nin los anguaño nomaos aguilandos, esto ye, un grupu de neños y neñes cantando villancicos y tocando la pandereta, tienen que ver coles costumes populares asturianes nesta época del añu, cuando se celebraba’l solsticiu d’iviernu –ritos adaptaos llueu pola Ilesia–. Éstes tán desaniciaes o a piques d’ello.

El nataliegu –tamién nomáu leñu o troncu de Navidá–  ye una de les tradiciones que los mayores de delles zones d’Asturies, como Casu, Grau o Llaviana, tovía recuerden. Consiste n’echar al fueu del llar un tueru de madera’l día de Nuechebona, xeneralmente de carbayu, al entender que los sos restos sirviríen pa favorecer la fertilidá de la casa y del ganáu, y como defensa énte’l mal. Esta costume, con dalguna variante, repítese en dellos puntos Europa, como ye’l casu de Serbia, Inglaterra, Westfalia, Provenza, Euskadi o Catalunya, país ésti últimu nel que’l tueru se cargaba de dulces pa los neños y neñes. Esta práutica quedaba reducida al ámbitu familiar, anque en Miranda de l Douro y Trás-os-Montes facíase en comuña, con grandes fogueres.

“Ye una costume fácil de recuperar”, apuntó Álvarez Peña sobre’l nataliegu enantes de falar de los aguilandos o mazcaraes d’iviernu. Éstos desarrollábanse en díes marcaos, esto ye, Nuechebona, Navidá, Añu Nuevu y Reis, y consistía nun grupu de mozos que percorríen el pueblu pidiendo l’aguilando per toles cases, onde la xente esparaba-yos con comida, dulces y oruxu. “Si nun paraben, los habitantes d’esa casa pensaben que tendríen mala suerte tol añu”, esplicó. Tamién reciben el nome de mazcaraes d’iviernu porque diben mazcaritaos de personaxes que representen la lluz –nomaos tamién los guapos– y la escuridá. Éstos suelen ser fixos y representen fuercies de la naturaleza; asina, atopamos, tanto n’Asturies como n’otros llugares, a una vieya (l’iviernu) y a un osu (señor de les viesques) o un diablu –“suel apaecer ún o l’otru, anque hai sitios onde salen los dos” –, ente otros.

Nos años últimos, dellos grupos de xente tán puxando por recuperar esta costume nos sos pueblos, anque non en tolos llugares respeten la tradición como se debiera, según esplicó’l xixonés, que punxo como exemplu d’un bon llabor el que tán desendolcando Os Reises del Valledor. “Hai cientos d’aguilandos que podríen recuperase”, apuntó, pa depués especificar que “lo que nun se pue facer ye garrar y llevar a Os Reises a Candás. Hai que recuperar la tradición de la zona”.

Los regalos

El fechu de dar regalos nesta época ta afitada de tiempu atrás, yá que yera una costume pagana que la Ilesia quixo desaniciar. Ésta nun tenía nada que ver con Papá Noel (protestantismu) o los Reis Magos (catolicismu), nin tampoco consistía en regalar xuguetes –“nun había sitios nos pueblos onde mercar regalos”–, sinón que solíen ser dulces que se daben p’Añu Nuevu. Al nun poder eliminar esta tradición, lo que fixo la relixón foi adaptala, camudándola de fecha. El restu, yá foi obra de les multinacionales y el consumismu.

Sobre’l papel que xueguen otros personaxes paralelos a los Reis Magos y Santa Claus, como pue ser L’Esteru (Cantabria), l’Olentzero (Euskal Herria), O Apalpador (Galicia) o mesmamente L’Anguleru (Asturies), Álvarez Peña comentó que “nun toi en contra de que salgan coses nueves”, pero sí alertó de la peligrosidá qu’hai de que nunos años la realidá se confunda y estos seres s’afiten na memoria coleutiva como dalgo tradicional cuando nun lo ye, como asocede anguaño col carboneru vascu.

Pa finar la so intervención, l’etnógrafu apuntó que nel terrén de les tradiciones d’esta época del añu “ta too por facer” y alvirtió que “queda pocu tiempu pa recuperar estes coses” yá que les persones que caltienen estes costumes na memoria tienen agora 80 o 90 años. Darréu, tomó la pallabra Guardado, que mostró una imaxe inglesa del sieglu XIX del Christmas Father –Padre de la Navidá, nome que recibía n’Inglaterra Santa Claus– portando un tueru al llombu, en rellación cola tradición del nataliegu. Sobre’l llabor de Reciella coles costumes asturianes de Navidá, consideró que “sería guapo adaptales pa los guaḥes”. “Son coses que nun se pueden forzar, pero si que ye bono que se conoza qu’esisten”, añadió.

Na semeya, Guardado y Álvarez Peña.