“N’Equo defendemos ensin ambigüedaes la cooficialidá del asturianu”, afirma González

Nacho González, covoceru d’Equo Asturies, afirmó esti miércoles que la so formación defende la cooficialidá del asturianu “ensin ambigüedaes”. Los ecoloxistes van acudir en solitariu a les Nacionales depués de nun llegar a bon puertu la so propuesta de converxencia con Podemos, organización cola que sí van compartir espaciu en delles candidatures municipales.

Nuna rueda de prensa celebrada tres un conceyu cola Xunta pola Defensa de la Llingua Asturiana (XDLA), representada por Carlos Pulgar y Damián Barreiro, Equo Asturies ratificó’l so compromisu pa cola llingua asturiana. “N’Equo defendendemos  ensin ambigüedaes la cooficialidá del asturianu”, afirmó González faciendo insistencia nes pallabres “ensin ambigüedaes” porque “paez que nestes selmanes en dalgunes fuercies polítiques hai un discursu ambiguu con respeuto a la necesidá d’oficializar l’asturianu”.

“Nós tenémoslo nidio dende hai tiempu; tenémoslo aprobao nos documentos correspondientes al traviés de les reuniones y grupos de trabayu que fiximos mientres too esti periodu”, continuó González, que considera que la llingua asturiana “necesita una reforma del Estatutu d’Autonomía pa da-y el derechu a la ciudadanía asturiana de poder deprendela, poder usala y entendela”. “Tamos nun tiempu políticu nuevu onde toca moyase pol asturianu”, insistió’l covoceru d’Equo, consciente de que les polítiques desendolcaes hasta agora nun son suficientes, sobre manera no que respeuta a la estaya educativa.

Pulgar, voceru de la XDLA, destacó pela so parte el compromisu públicu d’Equo Asturies de llevar la oficialidá nel so programa y tamién fixo referencia a la necesidá de “un tiempu nuevu” tres 30 años de midíes llegales “que demostraron ser insuficientes pa la supervivencia de la llingua asturiana”. Al respeuto señaló que toles selmanes hai un exemplu nuevu “de cómo la falta d’oficialidá afeuta a la situación de la llingua asturiana”. Si hai unos díes foi’l refugu de la especialidá docente por parte del Ministeriu d’Educación, Cultura y Deporte cola disculpa de que l’idioma nun ye oficial, “esta selmana vemos como salió un borrador de lo que va ser el currículu de Bachilleratu que propón un recorte del 75 por cientu de les hores de Llingua Asturiana, lo que va suponer de facto la desapaición de la so enseñanza nesta etapa educativa”, onde yá de por sí’l so status actual ye esmolecedor. “La falta d’oficialidá ye una piedra constante nel camín”, insistió Pulgar.

La XDLA, descontenta cola posición actual de Podemos

Dientro de la ronda de contautos públicos y privados de la XDLA con formaciones polítiques de cara a les Nacionales del 24 de mayu, que de momento sirvieron p’algamar el compromisu pola oficialidá d’Izquierda Xunida y Equo, ta prevista una con Podemos, qu’entovía nun se celebró. Entrugáu pola ambigüedá de les manifestaciones de los sos cabezaleros, que refuguen referise a la pallabra ‘oficialidá’ en too momentu, Pulgar confirmó “que ye evidente que nun nos tán gustando les sos declaraciones”, calificando de “inxeniería llingüística” la pallabrería utilizada pa evitar “el términu que tien valor xurídicu: oficialidá”.

Dende l’asociación cívica cuenten con aconceyar pronto colos sos responsables “pa esponer les nueses razones” y son optimistes al respeutu dada “la lóxica de la propia formación” y el sentir “de la mayoría de les sos bases”. “Sería incomprensible qu’una fuercia política que se diz portavoz de los movimientos sociales renunciara a representar los derechos d’una parte mui importante de la población y les aspiraciones d’un movimientu social que vertebró bona parte de la historia contemporánea d’Asturies”, añadió Pulgar.

En solitariu a les Nacionales

Azulina Llano, covocera d’Equo Asturies, encargóse d’abrir la rueda de prensa d’esta mañana cola anuncia de que la formación “concurrirá en solitariu” nes eleiciones de mayu. Los ecoloxistes espublizaran en setiembre el 'Manifiestu por una nueva democracia’ que buscaba una confluencia d’organizaciones y persones independientes “que se vio recompensada cola formación de candidatures ciudadanes n’escenarios nos que se dieron condiciones favorables”, como Avilés, Llanes, Llaviana, Uviéu o Xixón, dalgo que nun foi posible a nivel nacional. “Por estes circunstancies vímonos obligaos a presentar candidatura en solitariu pa que la ecoloxía política tea presente nes eleiciones autonómiques y tenga posibilidá d’algamar representación nes instituciones”, esplicó Llano.

Asina, Equo punxo en marcha un procesu de primaries abiertes ente simpatizantes y afiliaos pa escoyer, en paridá de xéneru, a los cabeza de llista: l’avilesín David Díaz y la ḷḷeniza Eva del Fresno. Próximamente, el procesu completaráse con la eleición del restu de la llista y de les persones qu’ocupen los primeros puestos nel occidente y l’oriente; tamién l’afitamientu del programa eleutoral a partir de les conclusiones de los diferentes grupos de trabayu entamaos al respeuto. Díaz esplicó que la decisión de concurrir en solitariu a les eleiciones vien “pola falta d’una propuesta concreta y llamativa de Podemos sobre la mesa pa poder siguir colos procesos de confluencia” y la necesidá de que la ecoloxía política “tenga un güecu na sociedá asturiana” consciente de que “l’alternativa verde ye real pa dar soluciones a tolos problemes d’anguaño, non sólo los ambientales, sinón tamién los socioeconómicos”.

Pela so parte, Del Fresno destacó’l compromisu de la formación pa colos “principios que me gustaría que se desarrollaren na sociedá, como la sostenibilidá ecolóxica, la igualdá, la tresperencia y la radicalidá democrática”. Nesi sen, espera aportar la so esperiencia amplia nos movimientos sociales, sobre manera nel feminista.

Na semeya, Pulgar, Llano y González.