“La Sidra” refuga l'anteproyectu de llei que va prohibir el consumu d'alcohol hasta los 18 años

La revista “La Sidra” refuga l'anteproyectu de llei d'Atención Integral en Materia de Drogues del Principáu que pretende alzar de 16 a 18 años la edá mínima pal consumu llegal d'alcohol. Esixen un tratu estremáu pa la sidra.

Dende “La Sidra” consideren ilóxicu l'aumentu de la edá llegal pa beber alcohol ya que la lexislación asturiana “que respetaba la nuesa cultura ya identidá” llogró meyores resultancies oxetives que la lexislación española “a la qu'agora quieren plegase dende'l Principáu”. Según la encuesta estatal “Edaes 2011”, los mozos asturianos peracaben alcohol de forma más moderada que los sos homólogos españoles, suxetos a una lexislación prohibicionista.

Dende  “La Sidra” tarrecen que la nueva lexislación suponga un duru golpe pa la cultura sidrera asturiana, lo que tamién repercutiría na nuesa economía al perder a los consumidores d'esi grupu d'edá, que s'esviaríen a otru tipu de consumu como'l botellón”. Reivindiquen la dinámica cultural y socializaora de la sidra, que dexa “un acercamientu paulatín, gradual, moderáu y socializáu al consumu d'alcohol”. Por estos motivos, dende la publicación esixen al Principáu que'l consumu de sidra siga dexándose a partir de los 16 años.