“La botella de sidra foi un referente na industrialización de Xixón”, afirma Hevia Llavona

El xueves presentóse en Xixón la obra ganadora del V Premiu d’Ensayu y Trabayos d’Investigación Fierro Botas. Ésta ta dedicada a la botella de sidra asturiana, “un referente na industrialización de Xixón”, afirmó Inaciu Hevia Llavona.

L’etnógrafu xixonés ye l’autor de 'La botella de Xixón. Oríxenes y desendolcu hestóricu de la botella de sidra d'Asturies', un trabayu dedicáu a la historia d’esti recipiente, de formá única pa una cultura única como la sidrera asturiana, que va convertise nun “clásicu de consulta pa entender la evolución de la sidra asturiana”, según augura Xosé Nel Riesgo, direutor de la Fundación Municipal de Cultura, Educación y Universidá Popular. La obra, editada por Trabe, recueye una bona riestra de semeyes –y planos– de recipientes, asina como de La Industria y Gijón Fabril, referentes nel so tiempu na producción de vidru.

Carlos Rubiera, conceyal d’Educación, Cultura, Xuventú y Fiestes, tuvo presente xunto a Hevia y Riesgo, y encargóse de presentar l’actu, celebráu nel salón de receiciones de la Casa Conceyu. L’edil, énte un públicu formáu por miembros del xuráu y xente venceyao al mundu de la sidra, ente ellos Elías Carrocera, direutor del Muséu de la Sidra de Nava, destacó la importancia d’un premiu “que va ganando altor y prestixu”, con trabayos que “tienen pesu y faen aportaciones mui interesantes al estudiu del nuesu país”. Nel casu concretu de la obra d’Hevia, Rubiera destacó que “xunta aspeutos culturales y etnográficos con aspeutos industriales”.

Pela so parte, Riesgo, que presidió’l xuráu del gallardón, emponderó la trayeutoria del investigador xixonés, “que lleva años percorriendo les caleyes y caminos d’Asturies, estudiando una parte fundamental del nuesu pasáu, la nuesa identidá y la nuesa cultura, como ye’l mundu de la sidra asturiana, en concreto dende la etnografía”, y fixo referencia a un llibru “preciosu y espectacular” firmáu por Hevia sobre los llagares del conceyu de Villaviciosa. Al respeuto de 'La botella de Xixón. Oríxenes y desendolcu históricu de la botella de sidra d'Asturies', apuntó, na mesma llinia que Rubiera, “que una de les coses que más nos llamó l’atención ye que ye un llibru qu’axunta elementos del patrimoniu etnográficu colos elementos del patrimoniu industrial, dos de los pilares que la propia llexislación entiende por patrimoniu cultural”, pa depués añadir que “aporta elementos novedosos y cruciales pa la historia de la industria rellacionada cola sidra”. “Quería da-y les gracies a Inaciu pol so llabor, personal, paciente, d’años, y de verdadera pasión y amor por esti país asturianu”, finó Riesgo la so intervención.

Anguaño fabrícase fuera

“Ye un arguyu ver reconocíu esti trabayu precisamente nel pueblu d’ún”, afirmó Hevia, que calificó la botella de sidra asturiana “como un referente na industrialización de Xixón”, yá que les primeres empreses vidreres que s’asentaron na ciudá fixéronlo pol mundu de la sidra, algamando una calidá téunica peralta que-yos fixo ser un referente a nivel internacional. L’autor señaló que, pese a qu’hubo otres industries vidreres per Asturies, “les más importantes tuvieron en Xixón y esta botella ye insepartable a la ciudá”.  Asina, destacó qu’esti recipiente “fabricóse equí per cien años, dende 1880 hasta 1980, y ye una botella única nel mundu; ta diseñada ex profeso pa la nuesa sidra y ye un símbolu pa ella, tamién única nel mundu”. Ésta llamábase ‘molde fierro’ o ‘botella de sidra del país’ y casi nun varió dende la so creación.

Nesi sen, Hevia apuntó que “ye una pena qu’agora mesmu la mayoría de botelles qu’usen los llagares asturianos, anque caltengan esta forma única, sían importaes de Portugal, Burgos, Zaragoza, Sevilla o Vigo”, pa depués citar a Xovellanos, que yá a finales del sieglu XVIII llamentábase que “habiendo n’Asturies bayura de materia prima, nun había quién fixera una botella de sidra tan necesaria pa la esportación y el consumu”. Centrándose más nel conteníu del llibru, el xixonés esplicó que nél quier “reflexar la historia y la evolución del modelu, pero nun sólo eso”, sinón otros aspeutos venceyaos, como’l vasu de sidra, “insepartable de la botella”. Pa ello, desendolcó multitú d’entrevistes con trabayadores antiguos de les vidreres asturianes, sobre manera de La Industria y de Gijón Fabril, destacando l’aporte d’Antonio Martín Tolosa, direutor últimu de Gijón Fabril.

Pa finar´l’actu, Rubiera tomó la pallabra y señaló que “seguramente cuando llegue a casa baxaré al llagar a rebuscar perhí qué botelles hai d’eses pesaes, que sé qu’hai dalguna, tamién d’eses color carambelu, y a cotexar coles fiches del llibru la procedencia y les feches. Va prestáme munchísimo”.

Hai que recordar qu’esti gallardón, dotáu con 4.000 euros de premiu, lleva’l nome del xesuita Federico González-Fierro Botas n’homenaxe a esti espertu en llingua asturiana que finó n’accidente de tráficu en Rusia nel 2002. El xuráu que falló’l ganador tuvo presidíu por Riesgo y formáu por Humberto Gonzali García, escritor y xestor cultural; Roberto González-Quevedo González, secretariu de l'Academia de la Llingua Asturiana; Jaime González Fierro-Botas, filólogu y representante de la familia Fierro Botas; Alberto Álvarez Peña, ganador de la edición anterior del Premiu Fierro Botas por ‘Mitoloxía de los santos n'Asturies. Raigaños paganos nel cristianismu'; y María Xosé Rodríguez López, responsable de la Oficina de Normalización Llingüística, que fixo de secretaria.

Na semeya, Hevia, Rubiera y Riesgo.