“L’equipu de gobiernu tien un complexu d’inferioridá pa colo propio”, asegura BA-UNA de Gozón

Pablo Fernández, candidatu de Bloque-UNA pa l’alcaldía de Gozón, aseguró esti vienres que “l’equipu de gobiernu del PP tien un complexu d’inferioridá pa colo propio”. El Conceyu sustitúi’l Festival de la Marañuela por una Feria d’Abril.
 
“Nun creemos que la decisión de celebrar una Feria d’Abril sía dalgo aneudóticu. Tres esto ta una visión diferente de gobiernu y un enfoque del conceyu marcáu y erróneu. Al final, l’equipu de gobiernu del PP, que yá lleva ocho años al frente del Conceyu, manifiesta que tien un complexu d’inferioridá pa colo propio. Nun tien fe nin confianza nos recursos tanto humanos como económicos y culturales de Gozón. Siempre da más importancia a lo de fuera qu’a lo d’equí”, afirmó Fernández al respeuto de la celebración d’una Feria d’Abril en Selmana Santa en cuenta del Festival de la Marañuela, certame “que pidimos potenciar hai unos 20 díes”. “La so respuesta nun solo foi negativa, sinón qu’atopámonos con que nun va haber Festival de la Marañuela”, criticó’l candidatu de la coalición nacionalista, que resaltó que “nun ye que tenga nada contra la Feria d’Abril, pero creo que ta fuera de llugar nel contestu en que se produz y cómo se produz, sobre too si ye pa suplir lo de la marañuela. Ési ye’l gran fallu”.  
 
Ente les propuestes del Bloque por Asturies-Unidá Nacionalista Asturiana (UNA) de Gozón pa fortalecer el festival qu’entama toles selmanes santes l’Asociación d’Ames de Casa de Lluanco pasaben por “consolidar a la marañuela como un símbolu de Gozón que pue dir xuníu a otros como la maya, y al festival como una actividá que tamién incorporara productos de la güerta, la ganadería y de la mar de Gozón”, apuntó Fernández. Un concursu onde se premiase la meyor marañuela pa promocionar la ellaboración en casa, dalgo mui tradicional de Gozón; la constitución d’un galardón que llevare’l nome del dulce pa premiar a les persones que fixeren méritos pola promoción del conceyu nel esterior; y la incorporación de los hosteleros a esta celebración cola puesta en marcha esos díes d’un menú con productos típicos del conceyu, foron les otres propuestes de la coalición nacionalista.
 
La suspensión d’esti pequeñu festival nel que l’Asociación d’Ames de Casa de Lluanco ponía un par de puestinos onde vendíen les marañueles que facíen pa financiar les sos actividaes –tamién donaben parte de les perres a ONGs– “demuestra l’interés escasu del alcalde de Gozón pola promoción d’un productu tan típicu del nuesu conceyu como ye la marañuela. El festival yera una oportunidá de reafirmar esti productu nunes feches onde nos visita tanta xente”, señaló Fernández. Al respeuto, el candidatu de Bloque-UNA por Gozón considera que la Feria d’Abril nun incentiva’l turismu “porque la xente de fuera vien a conocer el conceyu al traviés de la so cultura, gastronomía y tradiciones”, dalgo que nun ye compatible con una celebración d’esti tipu.
 
Amás, Fernández considera que la celebración de la Feria d’Abril nun ayuda pa nada a la hostelería de Lluanco “porque pa esti eventu van contratase establecimientos de fuera de Gozón y d’Asturies, como una pulpería gallega”. Por último, el candidatu de la coalición a l’alcaldía señaló que "la información que nos llegó por parte de dalgunes de les sos integrantes ye qu’hai malestar” pola situación, dalgo que la presidenta del coleutivu, Celestina del Valle, desmintió. En declaraciones feches a ASTURIES.COM, Del Valle aseguró que la intención de l'Asociación d'Ames de Casa de Lluanco "ye la de retomar el festival l'añu qu'entra".
 
La razón principal pa que nun se faiga’l Festival de la Marañuela ye la imposibilidá p’atender la demanda alta de marañueles que tien el fornu de lleña que veníen utilizando les ames de casa. El Conceyu de Gozón ufrió a l'asociación un fornu pa facer les marañueles, que refugaron pola so capacidá pequeña. "Ye un fornu modernu que ta mui bien, pero nun nos valía pa facer los más de 400 quilos que se necesiten p'allargar la venta los cuatro díes de la Selmana Santa", señaló Del Valle. N’opinión de la coalición nacionalista, l’equipu de gobiernu nun se preocupó en buscar soluciones a esti problema y tomó la decisión más sencilla: entamar una Feria d’Abril en collaboración col dueñu de la discoteca Atlántida en vez de puxar por facer dalgo curioso alredor de la marañuela.