“L’asturianu nun pue ser un souvenir espuestu nuna tienda que naide visita”, denuncia Barreiro na entrega de los Premios Lliterarios 2014

|

Esti xueves entregáronse n’Uviéu los Premios Lliterarios 2014, gallardones “bien representantivos del estáu de la lliteratura” en llingua asturiana, en pallabres del viceconseyeru Alejandro Calvo. Nel actu hebo llugar pa la denuncia, como la fecha por Damián Barreiro, que demandó que l’asturianu nun fora “un souvenir espuestu nuna tienda que naide visita”.

La escritora Vanessa Gutiérrez encargóse de conducir la gala celebrada nel paraninfu de la Universidá d’Uviéu, que tuvo presidida por Calvo, viceconseyeru de Cultura y Deporte; Víctor Guillermo García García, vicerrector de Campus, Informática y Infraestructures; y Gerardo Fabián, alcalde de Cabranes. El primeru en recibir el gallardón, consistente nuna pieza artística esclusiva de nome ‘Árbol de les lletres’ –a lo qu’hai que sumar una recompensa de 3.000 euros–, foi Enrique Carballeira, merecedor del VI Premiu Alfonso Iglesias de cómic pola obra ‘L’arume de la tierra’. El periodista piloñés emponderó na so intervención la importancia del cómic pa esperarder l’idioma ente los neños y neñes y afitó’l so compromisu de siguir “defendiendo y promocionando la llingua asturiana”.

El ganador del VII Premiu María Xosefa Canellada de lliteratura infantil y xuvenil, Carlos González Espina, faló de ‘Cápsules de tiempo’, trabayu ganador que definió como “una nuez con cáscara moderna, pero que nel interior tien histories del pasáu”. “Son cinco histories pequeñes nes que yo nun invento nada, sinón que xunto, amaso, histories que me contaron los paisanos de Belonciu na llingua que yo mamé” y qu’usó hasta los 10 años cuando, como tantos chavales n’Asturies, “abandonamos el pueblu pa siempre” y l’asturianu nun taba na realidá escolar.

Una RTPA “comprometida cola promoción y difusión de la llingua”

Damián Barreiro, merecedor del XX Premiu Máximo Fuertes Acevedo d’ensayu por ‘Caleya Sésamu: el papel de la televisión na tresmisión interxeneracional de la llingua’, protagonizó’l discursu más reivindicativu. Nun primer momentu defendió la importancia de les industries culturales pa crear riqueza nel país, afirmando que “los territorios más prósperos son aquellos que tienen más población ocupada nel sector cultural”, siendo la llingua propia “un mercáu” en sí mesma, polo qu’entiende que “l’asturianu nun pue ser una anécdota; un souvenir espuestu nel escaparate d’una tienda que naide visita”. Asina, demandó a los poderes públicos “un esfuerciu” pa que sían “los primeros en defender esti productu; esta marca; esta llingua. Nun podemos con más recortes y necesitamos l’apoyu de les instituciones, sobre manera en tiempos de crisis; necesitamos la especialidá docente pa los maestros d’asturianu; y necesitamos una televisión y una radio pública comprometida cola promoción y difusión de la cultura y llingua propia”.

El periodista defendió tamién la creación d’una industria del doblaxe n’Asturies porque “sentir a Los Picapiedra, Astérix y Harry Potter falar nel nuesu idioma sería una inyección d’autoestima nel alma d’esti pueblu; la meyor manera de proyeutar la nuesa identidá cultura d’una manera crítica y renovadora, non namás antropolóxica”. Por último, recordó que “si desapaez l’asturianu, desapaez dalgo más qu’una llingua; desapaez un pueblu” y despidióse con un “oficialidá y llarga vida a Os Bolechas”. La ganadora del XX Premiu Xuan María Acebal de poesía con ‘L’aire ente la rama’ –“un llibru que ta escritu pa los recuerdos d’infancia” –, Ángeles Carbajal, quixo en primer llugar “apoyar tolo qu’acaba d’esponer Damián Barreiro”, pa depués dar agradecimientos pol premiu, sobre manera al “esfuerzu y amor dedicáu a la llingua asturiana por toos cuantos escribieron nella y con ella, faciendo lliteratura coles mesmes pallabres coles que vivió tanta xente de la nuestra tierra qu’enxamás pudo escribir, pero a la que-y debemos un mundu, que ye’l nuestru; y unes pallabres, eses pallabres que nos dixeron”.

El premiu más veteranu, el Xosefa Xovellanos de novela, que yá lleva trenta y cincu ediciones, foi p’Antón García, trés vegaes con ésta ganador del gallardón, gracies a la obra ‘Crónica de la lluz y la solombra’. Na so intervención, el de Tuña recordó la so primer rellación col Xosefa Xovellanos, nun primer momentu Premiu Diputación d’Asturies y de narrativa. “Foi na yá alloñada fecha de 1980, na primer convocatoria d’esti premiu, cuando asistí, con 19 años, sorprendíu, al debate dialéctico que se formó alredor de quién merecía esi premiu”, Roberto González-Quevedo o Andrés Solar, “que representaben les dos maneres qu’había naquellos años d’entender la lliteratura y seguramente la manera tamién d’entender la cultura asturiana”, esto yera, la visión del Conceyu d’Asturies en Madrid y la de Conceyu Bable, “organización a la que de dalguna manera toos-y debemos tar equí nesti momentu”–. “Esi lobby, como asina se pue llamar al Conseyu d’Asturies en Madrid, movióse mui hábilmente pa que’l premiu nun lu llevara, como yera d’esperar, una novela que venía de la mano de Conceyu Bable, y se tuviera en cuenta tamién la de Roberto González-Quevedo”, apuntó.  

Sobre ‘Crónica de la lluz y la solombra’, esplicó que se basa en “una de les munches histories que me contaba’l mio padre cuando yo yera neno”, la del Cristu de L’Azurera, un paisanu que se fixo célebre “tristemente” por ser la cabera persona axusticiada en plaza pública n’Europa, nel 1899, pa lo que vieno un verdugu de Burgos hasta la plaza Las Campas de Tinéu pa finar cola vida d’esti home, “que matara dos años enantes a la muyer y a un fíu”.

Actuación de Mapi Quintana y Elías García

El viceconseyeru Calvo foi l’encargáu de zarrar l’actu con un discursu nel que foi analizando’l llabor y trayeutoria de caún de los premiaos, un amiestu de xuventú y veteranía que faen que los gallardones entamaos nel 2014 pola Conseyería d’Educación, Cultura y Deporte sían “bien representantivos del estáu de la lliteratura” en llingua asturiana anguaño. “Amás de da-yos la norabona quiero pidi-yos a los ganadores que nun cesen nel so empeñu de dignificar l’asturianu al traviés de la creación”, finó Calvo, representante únicu de l’Alministración na gala pola ausencia yá conocida de la conseyera Ana González y la d’última hora d’Ana María Fueyo, direutora xeneral de Política Llingüística, por enfermedá.

Mapi Quintana y Elías García punxeron la nota musical interpretando cuatro temes del conceyu de Ḷḷena recoyíos por Xosé Antón Fernández ‘Ambás’ y Ramsés Ilesies.

Na semeya, momentu de la intervención de González Espina, col restu de premiaos detrás.

Contador Estadistiques