“Igor y Carlos foron fundamentales na música asturiana de los años últimos”, afirma Boni Pérez

La música asturiana va homenaxar a Igor Medio y Carlos Redondo esta fin de selmana. Más de venti grupos van actuar n’once llocales xixoneses nesta edición de N’Alcordanza pa recordar a dos persones “fundamentales” na escena.

Asina definió a los dos ‘felpeyos’ Boni Pérez nel actu de presentación del eventu que tuvo llugar ayeri nel Café Trisquel y nel que’l músicu tuvo acompañáu polos otros dos organizadores d’esta iniciativa que yá cumple siete años, Rubén Ardura y Ruma Barbero. Los trés decidieron dar un pasu alantre na edición nueva de ‘N’Alcordanza d’Igor y Carlos’ y convertila nuna cita reivindicativa y nun homenaxe a los llocales que programen música en direuto. “Pensamos que yera mui interesante xuntar les dos variables nes que los dos músicos movíense tradicionalmente, el folk y el rock, pero non separtaos, como otros años, sinón amestaos, porque la xente tien munchos gustos diferentes”, esplicó Ardura, qu’añadio que tanto a Igor como a Carlos “prestaría-yos muncho qu’esta cita sirviera pa reivindicar la música asturiana dende’l puntu de vista llaboral y como seña d’identidá; como industria cultural”. Pa ello, enantes de cada actuación, va lleese un manifiestu nel que se demanden trés puntos básicos, que resumió Barbero en que “tien qu’acabase que les y los trabayadores de la música coticen el día que toquen; “que los músicos tienen que tener un sitiu onde espresase y onde tocar”; y “que ye necesario un circuitu profesional n’Asturies y que les instituciones cuenten cola música asturiana como una industria asturiana más”.

Al respeuto del segundu puntu, Barbero recordó les torgues que sufren los llocales que programen música en direuto por parte “de les instituciones y les sociedaes d’autores”, mientres que, en referencia al terceru, punxo l’exemplu del sofitu que recibe n’Euskadi, Catalunya y Galicia la música del país mientres qu’equí la marca Asturies nun cuenta cola música asturiana. “Tenemos muncha música bona y ye una pena cuando vemos un anunciu col osu Yogui y música de Mike Oldfield”, añadió’l dibuxante y miembru de Felpeyu. Cola llectura del manifiestu preténdese “reforciar la idea que se quier tresmitir coles actuaciones y que la xente qu’acuda nun se quede namái na cuestión musical-festiva, que tamién, cómo non”, añadió Ardura.

Na so intervención, Pérez recordó aquella primer edición nel 2007, na playa d’El Natahoyo, “que foi tamién una reivindicación de la música asturiana” al contar con namái artistes asturianos pese a la posibilidá de trayer xente de fuera que diera más sonadía al actu. Tamién destacó la intención que tien esta edición de N’Alcordanza de “reconocer el llabor de los llocales que, contra vientu y marea, siguen programando música a pesar de que, a veces, sufren un verdaderu acosu y falta de comprensión por parte de les instituciones”. Nesi sen, la organización del eventu programó los conciertos teniendo en cuenta les carauterístiques propies del llocal: jazz, nel Café Alambique, o tonada, na Sidrería Canteli, por poner dos exemplos.

Otra manera, nel actu de presentación anunciáronse dos pequeñes modificaciones nel cartelu de N’Alcordanza. Asina, por motivos ayenos a la so voluntá, Lucas y Los Patosos nun van poder actuar el vienres en The Class (21.30 hores) xunto a Los Izquierdos y el so puestu van ocupalu Los Testigos. Mientres, el gaiteru Llorián García incorpórsae a la cita y va acompañar el sábadu a Ismael Tomás y Mariluz Cristóbal Caunedo na Canteli (14.30 hores). Tamién se dieron detalles de la fiesta N’Alcordanza na madrugada del vienres al sábadu nel Muddy’s, que va contar con una seleición musical a cargu de Boni Pérez, de manera principal de la época que va del 78 al 86.

Los conciertos

Tres los cambios d’última hora, la programación del festival ‘N’Alcordanza d’Igor y Carlos’ va quedar asina: va inaugurase mañana en Toma 3 cola actuación de Moonglow (20 hores), pa depués continuar colos conciertos en The Class de Los Izquierdos y Los Testigos (21.30 hores) y la celebración va siguir nel Muddy’s con la ‘Folixa N’Alcordanza 2013’, a partir de les 00.30 hores.

Yá de sábadu, l’actividá va principiar bien ceo, a les 13 hores, cola música de Rubio, Pizarro, García y Morales nel Café Alambique. A les 14.30 hores, va actuar Toli Morilla vs El Tamar en La Vida Alegre, y Ismael Tomás y Mariluz Cristóbal Caunedo, acompañaos na gaita por Llorián García, na Sidrería Canteli, pa continuar a les 17.30 hores nel Ca Beleño con Cazurrín, Tuenda y Felpeyu. Pa les 19 hores ta previstu un conciertu de DRD y Seu nel Café Trisquel, a lo que van siguir les actuaciones de The Traveling Zoo y Luis Dadá n’El Patio de la Favorita (20.30 hores) y de Lavandera y Medication/2 nel Café Dam (22 hores). Nacho Vegas, Pauline en la Playa y Radio Fox van zarrar estes dos xornaes de música en direuto n’alcordanza d’Igor y Carlos con un conciertu nel Buddha a partir de les 23.30 hores. Hai que destacar que tanto grupos como llocales participen de manera desinteresada nesti eventu.

Na semeya, Ardura, Barbero y Pérez.